د طالبانو اقتصادي کمېسیون وايي، چې ددغه کمیسیون د تخنیکي کمېټې په غونډه کې د کاني موادو د کیفیت معلومولو لابراتوارونو لپاره ۲۳۳ میلیونه افغانۍ بودجه په پام کې نیول شوې ده. یاد کمیسیون وايي، ۲۱۸ میلیونه افغانۍ به پر پرمختللو او په نوې ټکنالوژۍ سمبال تجهیزاتو ولګول شي.
د طالبانو د ریاست الوزرا اقتصادي معاونیت نن سې شنبه، د لیندۍ ۱۸مه وویل، چې ددې ډلې د اقتصادي کمېسیون د تخنیکي کمېټې په نوبتي غونډه کې د کانونو او پټرولیم وزارت پر وړاندیز بحث شوی دی.
په دغه وړاندیز کې په کابل او ولایتونو کې د کاني موادو د کیفیت معلومولو لپاره د پرمختللو لابراتوارونو د جوړېدو موضوع یاده شوې، چې وايي، له هراړخیز بحث وروسته تایید شوې او د نهايي تصمیم په موخه اقتصادي کمېسیون ته راجع شوې ده.
دې کمیټې د کاني موادو د کیفیت د معلومولو لابراتوارونو لپاره ۲۳۳ میلیونه افغانۍ منظور کړې دي، چې ۱۵ میلیونه افغانۍ به یې په ودانیزو چارو او ۲۱۸ میلیونه افغانۍ به یې پر پرمختللو او په نوې ټکنالوژۍ سمبال تجهیزاتو ولګول شي.
طالبان داسې مهال ددې پرمختللو او په نوې ټکنالوژۍ سمبال تجهیزاتو خبره کوی، چې پر دې ډلې نړيوال بندیزونه لګیدلي او بهرنۍ کمپنۍ د پیسو په انتقال کې له ستونزو سره مخ دي.
