د ناټو سرمنشي مارک روټه خبرداری ورکړی، چې ښايي روسیه په راتلونکو پنځو کلونو کې د دغه تړون پر یو غړي هېواد برید وکړي. دغه څرګندونې داسې مهال کېږي، چې د امریکا ولسمشر ډونالډ ټرمپ هڅه کوي په اوکراین کې د روسیې جګړه پای ته ورسوي.
د روسیې ولسمشر ولادیمیر پوتین د روانې میاشتې په لومړیو کې ویلي و، چې هېواد یې له اروپا سره د جګړې اراده نهلري؛ خو «که اروپا جګړه وغواړي یا یې پیل کړي؛ نو روسیه هم جګړې ته چمتو ده.»
روټه ویلي: «د ناټو ګډ دفاعي سیسټم پیاوړی دی؛ خو جګړه زموږ د دروازې تر شا ده او ډېری کسان د وضعیت جديت نه احساسوي.» دغه خبرداری د لوېدیځو استخباراتي بنسټونو له وروستیو هغو ارزونو سره سمون لري، چې مسکو یې «د وېرې خپرول» ګڼي.
هغه ټینګار کړی، چې د دفاعي لګښتونو او د وسلو د تولید وړتیا باید «په چټکۍ» سره لوړه شي؛ څو د غړو هېوادونو وسلهوال ځواکونه «هغه څه ولري، چې زموږ د امنیت د ساتنې لپاره اړین دي.»
