د طالبانو ویاند ذبیح الله مجاهد د شنبې په ورځ اعلان وکړ، چې د طالبانو د ډلې بنسټ ایښودونکي او پخواني مشر ملا عمر مجاهد مور مړه شوې ده. هغه وویل چې د ملا عمر د مور د جنازې او فاتحې لمونځ به د روانې اونۍ د یکشنبې او دوشنبې په ورځو په کندهار کې ترسره شي.
د طالبانو ویاند ذبیح الله مجاهد نن د شنبې په ورځ، د لیندۍ ۲۲مه په اېکس خواله رسنۍ لیکلي چې د ملا عمر د مور جنازه به د کندهار ولایت په عیدګاه جومات کې ترسره شي.
طالبانو د ملا عمر د مور د عمر یا د مړینې د لامل په اړه جزییات نه دي ورکړي.
ملا عمر د طالبانو مشر او له ۱۹۹۶ څخه تر ۲۰۰۱ پورې د دې ډلې د رژیم واکمن و.
په ۲۰۰۱ کال کې د امریکا په مشرۍ د نړیوال ایتلاف له برید وروسته، د طالبانو رژیم نسکور شو او ملا عمر پټ شو.
هغه تر خپل مرګ پورې په پټه ژوند کاوه، او د هغه د مړینې خبر په ۲۰۱۵ کال کې تایید شو.
په تیرو کلونو کې طالبانو ویلي وو، چې ملا عمر د ۱۳۹۲ کال د ثور په ۲۴مه د نري رنځ له امله مړ شو. طالبانو د واک بیا ترلاسه کولو وروسته، د ملا عمر قبر په زابل ولایت کې راڅرګند کړ.
د طالبانو په وینا، د ملا عمر پلار، غلام نبي، په ۱۳۴۴ هجري قمري کال کې په کندهار کې مړ شوی و. هغه پنځه کلن و چې پلار یې وفات شو.
