د طالبانو د دفاع وزیر ملا یعقوب مجاهد د کندهار په ژړۍ ولسوالۍ کې یوې دینې مدرسې فراغت غونډې ته د وینا پرمهال ویلي، خلک باید خپل اولادونه بې تعلیمه پرېنږدي او زده کړې پر وکړي. په داسې حال کې چې یادې ډلې له څلورو کالونو راپردېخوا د نجونو پر مخ له شپږم ټولګي پورته ښوونځي تړلي دي.
محمد یعقوب مجاهد تېره ورځ د کندهار په ژړۍ ولسوالۍ کې د یوې دیني مدرسې څخه د طالبانو فراغت غونډه کې ګډون کړی و.
نوموړي د فراغت غونډې پرمهال خپله وینا کې ویلي، چې د زده کړو لپاره زمینه برابره ده او خلک باید په خپلو اولادونو عصري او دیني زده کړې وکړي.
یعقوب مجاهد زیاته کړې:«موږ د حکومت په توګه، د پوځ په توګه، دپولیس په توګه او د یو نظام په توګه توله ستاسو په خدمت کې یوو. ځیني په سرحداتو کې له خاورې څخه ساتنه کوي، ځیني د کورونو، مدرسو، ښوونځیو، پوهنتونو، د سوداګرۍ مرکزونه ساتنه کوي او ستاسو د امنیت سر او مال ساتنه کوي. زموږ غوښتنه داده، چې ښوونځي او مدرسې درته جوړ دي او تاسو یې ملاتړ وکړئ خپل اولادونه بې تعلیمه مه پریږدئ.»
دغه لوړپوړي طالب چارواکي د خپلې وینا پرمهال د نجونو او ښځو د زده کړو په اړه څه نه دې ویلي.
نوموړي پرداسې مهال خلک د خپلو اولادونو زده کړو ته هڅولي، چې د تېرو څلورو کلونو راهیسې یادې ډلې له شپږم ټولګي پورته د نجونو پر زده کړو بندیز لګولی دی، چې له امله یې میلیونونه نجونې له زده کړو بې برخې شوې دي.
