د امریکا مرکزي قوماندانۍ «سنټکام» اعلان کړی، چې د شنبې په ورځ په سوریه کې د ډزو له امله د دغه هېواد دوه سرتېري او یو ژباړن وژل شوي او درې نور ټپیان دي. سنټکام ویلي، چې د داعش یوه وسلهوال د کمین وروسته پر امریکایي سرتېرو ډزې کړي او هغه هم د نښتې پر مهال وژل شوی دی.
سنټکام د شنبې په ورځ (د لیندۍ ۲۲مه) په یوې خبرپاڼه کې ویلي، چې پېښه د سوریې د حمص ولایت د پالمیرا ښار ته نږدې شوې.
د پنتاګون ویاند شان پارنل پر اېکسپاڼه لیکلي، برید هغه وخت وشو کله چې سرتېرو د یوه مهم مشر سره لیدنه کوله. هغه وویل، چې د دوی ماموریت په سیمه کې د داعش او ترهګرۍ پر وړاندې د روانو عملیاتو ملاتړ دی.
پارنل وویل، چې د برید په اړه څېړنې کوي او د وژل شویو سرتېرو نومونه او د اړوندو قطعاتو پېژندنې معلومات به تر ۲۴ ساعتونو پوري خپاره نهشي.
د امریکا ولسمشر وویل، چې دغه د امریکا او سوریې پر وړاندې د داعش لهخوا برید و او د سوریې په یوه خورا خطرناکه برخه کې ترسره شو، چې په بشپړ ډول د دوی تر کنټرول لاندې نه دی. ډونالډ ټرمپ وویل، چې د سوریې ولسمشر احمد الشرع د برید له امله «ډېر غوسه او په ژوره توګه اغېزمن» شوی دی.
د امریکا د دفاع وزیر پیټ هېګسټ د دې پېښې په غبرګون کې په خپل اېکس کې لیکلي: «پوه شئ، چې که امریکایان د نړۍ په هر ځای کې په نښه کړئ، د خپل پاتې لنډ ژوند هره شېبه به په دې وېره کې تېروئ چې امریکا به مو تعقیب، پيدا او بېرحمانه به مو ووژني.»
امریکا د سوریې په ختیځ کې سلګونه سرتېري لري، چې د داعش پر وړاندې د مبارزې لپاره د یوه نړۍوال اېتلاف برخه دي.
سوریه له لوېدیځو هېوادونو سره د خپلو اړیکو تر ښه کېدو وروسته تېره میاشت د داعش پر ضد د نړۍوال اېتلاف غړې شوه.
د سوریې د پخواني ولسمشر بشارالاسد د واکمنۍ پر مهال امریکا له دغه هېواد سره ډیپلوماتیکې اړیکې نه لرلې، خو د اسد د کورنۍ د پنځوس کلنې واکمنۍ تر پای ته رسېدو وروسته د دواړو هېوادونو اړیکې تودې شوې دي.
د سوریې ولسمشر احمد الشرع تېره میاشت واشنګټن ته یو تاریخي سفر وکړ او هلته یې د امریکا له ولسمشر ډونالد ټرمپ سره ولیدل او خبرې یې ورسره وکړې.
داعش په ۲۰۱۹ کال کې په سوریه کې ماتې وخوړه، خو د دې ډلې پټې حجرې لا هم په دغه هېواد کې مرګوني بریدونه ترسره کوي.
