په کابل کې د قطر سفیر مردف القاشوطي دوحې ته د افغانستان د تاریخي اثارو د لېږد او د اسلامي هېوادونو د موزیمونو د ګډ نندارتون په اړه د طالبانو د اطلاعاتو او کلتور له وزیر شیخ شېر احمد حقاني سره خبرې کړې دي.
د طالبانو د یاد وزارت په وینا، سفیر القاشوطي د اسلامي هيوادونو موزيمونو د ګډ نندارتون په اړه د معلوماتو شريکولو تر څنګ وويل چې دا نندارتون به د راروان میلادي کال په دویمه مياشت کې پرانېستل شي او د پرانېستې په مراسمو کې به يې د ګڼو اسلامي هېوادونو چارواکي ګډون وکړي.
هغه زیاته کړه، چې دا نندارتون به د اسلامي هېوادونو تر منځ د اړيکو د پراختيا او د یادو هېوادونو د تاريخي اثارو د پېژندنې سبب شي.
د طالبانو د اطلاعاتو او کلتور وزارت په یوه خبرپاڼه کې ویلي، چې سرپرست وزیر شیر احمد حقاني ویلي، چې د قطر د سفير په حیث د القاشوطي ټاکل کېدل به په بېلابېلو برخو کې د اړيکو د پراختیا او پياوړتیا سبب شي.
حقاني، سفیر القاشوطي ته د تمدني، علمي او تاريخي تبادلو په پراختیا د ټينګار تر څنګ د ګډو کلتوري پروګرامونو، نندراتونونو، او علمي کنفرانسونو د ترسره کولو وړانديز کړی.
د یادولو وړ ده، چې د طالبانو د اطلاعاتو او کلتور وزارت د قطر د اسلامي هېوادونو ګډ نندارتون لپاره ۳۶قلمه تاريخي اثار د لېږدولو لپاره ټاکلي، چې له اړوندو ادارو سره يې د لېږد او اداري چارو کارونه پرمخ روان دي.
