د طالبانو د بهرنیو چارو وزارت وایي چې امیر خان متقي نن د ایران د بهرنیو چارو وزارت د اسیايي څانګې له مشر او د دغه هېواد د بهرنیو چارو د وزیر له استازي محمد رضا بهرامي سره کتلي دي. بهرامي متقي ته د عباس عراقچي له لوري تهران ته د رسمي سفر بلنه هم سپارلې ده.
د طالبانو بهرنیو چارو وزارت څخه په خپره شوې خبرپاڼه کې راغلي چې بهرامي په تهران کې د ځانګړو استازو په کچه د وروستۍ ناستې په اړه مفصل معلومات وړاندې کړل او ټینګار یې وکړ چې د ایران لپاره له افغانستان سره اړیکې ارزښت لري.
هغه هیله ښودلې چې افغانستان د سیمې د یوه فعال غړي په توګه د سیمهییزو همکاریو په چوکاټ کې رغنده رول ولوبوي.
مولوي امیر خان متقي د طالبانو او ایران ترمنځ اړیکې مثبتې بللې او د تهران د ناستې په اړه یې د طالبانو دریځ روښانه کړی. نوموړي ويلي چې افغانستان اوس له ستونزمن حالت څخه وتلی او د پرمختګ پر لور «چټک ګامونه» اخلي.
د طالبانو د بهرنیو چارو وزیر ټینګار کړی چې افغانستان ته باید نور د یوې «مسالې» په توګه ونه کتل شي، بلکې د طالبانو د بهرنی سیاست د اساسي اصولو پر بنسټ د سیمې له هېوادونو سره د فعالو، متقابلو او په همکارۍ ولاړو اړیکو ملاتړ کوي.
د طالبانو د بهرنیو چارو وزارت وايي، دواړو لوریو دوهاړخیزې اړیکې مخ پر وده بللې دي او د طالبانو او ایران ترمنځ یې د بېلابېلو کچو د تماسونو پر دوام، د اړیکو پر پراختیا او د پلاویو پر تبادلې ټینګار کړی دی.
