د طالبانو د ریاست الوزرا اقتصادي مرستیال ملا عبدالغني برادر په کابل کې له یوې دیني مدسې څخه د طالبانو فراغت غونډه کې دیني عالمانو ته ویلي، چې باید خلکو ته د دیني ملکفیتونو ترڅنګ د یادې ډلې د نظام او ملي ګټو ساتلو روحیه هم ورکړل شي.
د طالبانو د ریاست الوزرا اقتصادي معاونیت نن د چارشنبې په ورځ د لېندۍ ۲۶مه د یوې خبرپاڼې په خپرولو سره ویلي، چې غني برادر په کابل کې د «جامعه فتح العلوم کابل» مدرسه کې د وینا پرمهال ویلي، چې مدرسې، د اسلامي ټولنو د دیني علم، جهاد، نبوي اخلاقو، روحي او فکري روززنې او اسلامي نهضت ستر بسټونه دي.
ملا برادر زیاته کړې:«علماء دې د وعظ او منبر ژبه نرمه کړي او خلکو ته دې د دیني ملکیفتونو ترڅنګ د اسلامي نظام او ملي ګټو د ساتنې روحیه ورکړي.»
همدارنګه د طالبانو د ریاست الوزرا اقتصادي مرستیال د ټولنې د فکري اصلاح، د غیر اسلامي فرهنګونو د له منځه وړلو او د اسلامي روایتونو د ساتنې په برخه کې د مدرسو رول مهم بللی او ټینګار یې کړی، چې مدرسې باید په هر ډول حالاتو کې خپل اصلي مسیر ثابت وساتي.
