د طالبانو د سترې محکمې لهخوا په دوو جلا خپرو شویو خبرپاڼو کې راغلي، چې په بلخ او جوزجان ولایتونو کې یې څلور کسان په دُرو وهلي دي. د یادې محکمې په خبره؛ دغه کسان یې «د شرابو د لېږد، زنا او نامشروع نکاح» په تور په دُرو وهلي دي.
د دغې محکمې په لومړۍ خبرپاڼه کې راغلي، چې په بلخ ولایت کې یې «د الکولي مشروباتو د لېږد» په تور یو کس ته د ۳۹ دُرو سزا ورکړې ده. د یادې محکمې په یوې بلې خبرپاڼه کې راغلي، چې د جوزجان ولایت په درزاب ولسوالۍ کې یې د دوو ښځو په ګډون درېیو کسانو ته «د زنا او نامشروع نکاح» په تور سزا ورکړې ده. له دې ډلې یې یوې مېرمنې او یو نارینه ته له یو تر درېیو کلونو تنفیذي بند او له ۱۵ تر ۳۹ دُرو سزا او بلې ښځې ته د ۳۹ دُرو سزا ورکړې ده.
طالبانو په تېرو درېیو میاشتو کې د افغانستان په ۱۹ ولایتونو کې د بېلابېلو تورونو په تړاو ۲۸۱ کسان په عام محضر کې په دُرو وهلي دي. د طالبانو د سترې محکمې د خبرپاڼو پربنسټ؛ یاد کسان «د نشهیي توکو د کارو بار، زنا، لواطت، غلا، له کوره د تېښتې او اخلاقي فساد په تورونو مجازات شوي.»
د خبرپاڼو له مخې؛ دغه کسان په ننګرهار، خوست، فراه، پکتیا، فاریاب، پروان، غور، لوګر، جوزجان، تخار، غزني، بلخ، کابل، لغمان، میدانوردګ، پکتیکا، کاپیسا او زابل ولایتونو کې په دُرو وهل شوي دي.
