د طالبانو د احصایې او معلوماتو ملي ادارې ویلي، په روان کال کې د وریجو ټولټال حاصلات ۴۴۷زره مټریک ټنو ته رسېدلي چې د تېر کال پرتله ۲سلنه زیاتوالی ښیي. یادې ادارې ویلي، چې روان کال د وریجو ترټولو ډېر حاصل له کندوز، سرپل، تخار، بغلان، ننګرهار، کونړ او بلخ ولایتونو راټول شوی دی.
د طالبانو د احصایې او معلوماتو ملي ادارې لهخوا پر اېکس پاڼه په خپرې شوې خبرپاڼه کې راغلي، سږ کال د افغانستان په ۱۸ ولایتونو کې په ۱۳۵زره هکټاره ځمکه وریجې کرل شوې چې له دې سره د وریجو د کښت کچه د تېرو کلونو پرتله لوړوالی ښیي.
په خبرپاڼه کې راغلي، په افغانستان کې د خوړو، کرنیز تخم او ضایعاتو په ګډون سږ کال ۷۲۰زره مټریک ټنه وریجو ته اړتیا ده. د یادې ادارې په وینا، د کرنې د پراختیا لپاره د کښت ساحو زیاتوالی او د حاصلاتو لوړوالی مثبت پرمختګ ګڼل کېږي؛ خو د اړتیا وړ ذخایرو برابرول او د کروندګرو ملاتړ لا هم مهم بلل شوی.
تر دې وړاندې په بغلان ولایت کې د طالبانو د کرنې، اوبو لګولو او مالدارۍ ریاست چارواکو هم ویلي وو، سږکال په دغه ولایت کې په ۲۸زره او ۶۲۰ هکټاره ځمکو کې وریجې کرل شوې چې د تېر کال پرتله یې ۸ سلنه کښت ډېر شوی دی.
