د امریکا کانګرس د بشارالاسد د واکمنۍ پر مهال پر سوریې لګول شوي بندیزونه په دایمي ډول لغوه کړل. د امریکايي چارواکو په وینا، دا اقدام کولی شي جګړهځپلې سوریې ته د بهرنیو پانګونو د بېرته ستنېدو لاره هواره کړي.
د فرانسې خبري اژانس د راپور له مخې، د امریکا سنا د ۲۰۱۹کال «د سیزر قانون» لغوه کول د کلنۍ دفاعي بودیجې په چوکاټ کې تصویب کړل. دا طرحه د ۷۷موافقو او ۲۰مخالفو رایو په ترلاسه کولو سره منظور شوه او تر دې مخکې د استازو جرګې هم تایید کړې وه. تمه کېږي، چې د امریکا ولسمشر ډونالډ ټرمپ دغه مصوبه لاسلیک کړي.
ټرمپ تر دې مخکې دوه ځلې د سوریې پر ضد بندیزونه په موقتي ډول ځنډولي وو، چې دا کار یې د سعودي عربستان او ترکیې د غوښتنو په ځواب کې کړی و؛ هغه هېوادونه چې د دمشق د نوي حکومت متحدان بلل کېږي. خو د سوریې موقتي ولسمشر احمد الشرع د دغو بندیزونو د بشپړ او دایمي لغوه کېدو غوښتنه کړې وه او خبرداری یې ورکړی و، چې که بندیزونه د امریکا په قوانینو کې پاتې شي، ان که عملي کېدل یې هم ځنډول شوي وي، د حقوقي خطرونو له امله به پانګهوال له سوریې څخه لرې وساتي.
