د امریکا د بهرنیو چارو وزیر مارکو روبیو وایي، چې امریکا د ایران له حکومت سره ډېر ژور او بنسټیز اختلافات لري او ایران د نړۍ له تر ټولو ډېر بندیز لګول شویو هېوادونو څخه شمېرل کېږي.
روبیو په خپلو څرګندونو کې وویل، چې د امریکا ستونزه د ایران له حکومت سره یوازې سیاسي نهده، بلکې د دغه حکومت د اټومي وسلو د ترلاسه کولو هڅې، د ترهګرۍ ملاتړ او د خپل ولس پر وړاندې چلند د اندېښنې اصلي لاملونه دي.
د امریکا د بهرنیو چارو وزیر همدارنګه د ایران او اسراییل تر منځ له ۱۲ ورځنۍ جګړې وروسته په ایران کې د ځپنې او اعدامونو پر زیاتېدو نیوکه وکړه او ویې ویل، چې د تهران واکمنان د خپلو خلکو اساسي حقونه تر پښو لاندې کوي.
روبیو زیاته کړه: «زه په نړۍ کې داسې بل هېواد نهپېژنم چې د هغه حکومت او ولس تر منځ دې دومره ژور واټن موجود وي. د ایران اوسنی حکومت د دې هېواد د خلکو استازیتوب نهکوي، حال دا چې د ایران ولس د لرغوني، ویاړلي کلتوري میراث او د ویاړ ډک تاریخ څښتن دی.»
هغه د ایران حکومت «روحاني او افراطي» وباله او ویې ویل، چې دغه واکمنان د هېواد شتمني د خلکو د هوساینې، د راتلونکي د تضمین او یا هم د کافي اوبو او برېښنا د برابرولو پر ځای، د نړۍ په بېلابېلو برخو کې د «ترهګرو» ډلو د مالي ملاتړ لپاره لګوي.
د امریکا د بهرنیو چارو وزیر په ټینګار سره څرګنده کړه، چې دا ډول تګلاره نهیوازې د ایران د خلکو پر ژوند ناوړه اغېز لري، بلکې د سیمې او نړۍ امنیت ته هم جدي ګواښ پېښوي.
ایران لا تر اوسه د امریکا د بهرنیو چارو وزیر د دغو څرګندونو په تړاو څه غبرګون نهدی ښودلی.
