د روسیې ولسمشر ولادیمیر پوتین د اروپايي ټولنې پر هغې جنجالي طرحې سختې نیوکې کړي چې غواړي د مسکو کنګل شوې شتمنۍ د اوکراین په ګټه وکاروي. هغه ویلي، د روسیې د کنګل شویو شتمنیو د کارولو طرحه په ښکاره ډول غلا ده.
ولسمشر پوتین دا کار په ښکاره توګه غلا وبلله او خبرداری یې ورکړ چې د دې طرحې احتمالي پلي کېدل به د غلو لپاره جدي پایلې ولري.
هغه زیاته کړه چې که اړتیا وي روسیه به د خپلو ګټو د دفاع لپاره په دې برخه کې له قضایي لارو کار واخلي.
د اروپايي اتحادیې مشرانو د لیندۍ په ۲۸مه په بروکسل کې پر دې هوکړه وکړه چې اوکراین ته به د ۱۰۶میلیارده ډالرو بېسود پور ورکړي، خو د دې سرچینو د برابرولو لپاره د روسیې د کنګل شوو شتمنیو د کارولو په اړه خبرې ناکامې شوي دي.
د امریکا ولسمشر ډونالد ټرمپ له یوې رسنۍ سره په مرکه کې د ونزوېلا سره د احتمالي جګړې امکان رد نه کړ او ویې ویل چې د ونزوېلا د تیلو وړونکو بېړیو ودرول کېدای شي د جګړې سبب شي.
هغه د این بي سي نیوز شبکې سره په خبرو کې په دې اړه ډیر جزییات ورنکړل، خو بیا یې په څرګنده ټینګار وکړ چې داسې امکان شته.
ټرمپ د سه شنبې په ورځ د هغو تحریم شویو تیل وړونکو بیړیو د «محاصرې» حکم ورکړ چې د ونزوېلا څخه تګ راتګ کوي. د امریکا چارواکو په خبره دا اقدام د ونزوېلا پر ولسمشر نیکولاس مادورو د فشار زیاتولو لپاره شوی دی. همداراز امریکا په دې وروستیو کې یوه تیل وړونکې بېړۍ چې د ونزوېلا په نږدې سیمو کې توقیف شوې وه، ضبط کړېده.
ولسمشر ټرمپ وویل چې د تیل وړونکو بېړیو توقیف به روان وي او نورې بېړۍ به هم ضبط شي. په ورته وخت کې هغه د دې پوښتنې په اړه چې ایا د واک څخه د نیکولاس مادورو لرې کول د واشنګټن وروستۍ موخه ده که نه، ډاډمن ځواب ورنه کړ.
د پاکستان بهرنیو چارو وزارت ویاند، امریکا ته د یاد هېواد د پوځ مشر د سفر په اړه راپورونه رد کړي او وايي چې امریکا ته د عاصم منیر د سفر په اړه تر اوسه کومه هوکړه او پلان نه دی جوړ شوی.
د پاکستان د بهرنیو چارو وزارت ویاند طاهر اندرابي تېره ورځ خبرې کنفرانس پرمهال وویل:«حقیقت دا ددی چې زه امریکا ته د پوځ د مشر د احتمالي سفر او مهالوېش په اړه هېڅ معلومات نه لرم. موږ باید د یاد سفر په اړه د پاکستان د حکومت رسمي اعلامه ته په تمه شو.»
د پاکستان د بهرنیو چارو د ویاند له کنفرانس څخه یوه ورځ وړاندې رویټرز خبري اژانس راپور ورکړی و، چې د پاکستان د پوځ او دفاعي ځواکونو مشر په راتلوونکو اونیو کې د امریکا د ولسمشر ډونالډ ټرمپ سره د لېدلو په موخه واشنګټن ته سفر کوي.
رویټرز دا راپور د پاکستان د دفاعي ځواکونو دفتر د اقتصادي ډیپلوماسۍ د یو چارواکي په ګډون د دوو باوري سرچینو په حواله ورکړی و.
خو د پاکستان د بهرنیو چارو وزارت ویاند ویلي:«د رویټرز راپور ښيي چې ګواکي دا سفر پلان شوی و او په اړه یې ډاډ شتون درلود. له همدې امله زه دا ردوم او د دې لېدنې لپاره تر اوسه کومه هوکړه یا پلان شتون نه لري.»
د پاکستان دپوځ د معلوماتو له مخې، عاصم منیر دمګړی په لیبا کې دی او نوموړي د خپل سفر پرمهال له طرابلس سره د پاکستان پر ژمنو ټینګار کړی دی.
د پاکستان د پوځ مشر عاصم منیر سږکال دوه ځله امریکا ته سفر کړی او په جون میاشت کې یې په سپینه ماڼۍ کې د امریکا له ولسمشر سره وکتل. د پاکستان د پوځ مشر د روان کال په اګسټ میاشت د دوهم ځل لپاره هم امریکا ته سفر وکړ او دغه سفر یې د اسلام اباد او واشکنټن ترمنځ د اړیکو «نوی فصل» وباله.
د اروپايي ټولنې مشرانو د اوکراین لپاره د ۱۰۶ملیارد ډالرو له سود پرته د پور ورکړې سره موافقه وکړه. یادې شورا ویلي چې دا پور به د راتلونکو دوو کلونو لپاره د اوکراین پوځي او اقتصادي اړتیاوې پوره کړي.
د اسوشیټیډ پریس خبري اژانس د راپور له مخې،د اروپايي ټولنې مشرانو د جمعې په سهار په بروکسل کې په یوه غونډه کې اوکراین ته د لوی پور سره موافقه وکړه، مګر د فنډونو د تمویل لپاره د روسیې د کنګل شویو شتمنیو په کارولو سره موافق نه شول.
د اروپايي ټولنې د هیوادونو اوه کلنه بودیجه اوس مهال د پور لپاره د اساس په توګه کارول کیږي.
اروپایي شورا مشر انتونیو کوستا پر ایکس خواله رسنۍ لیکي«موږ یوې موافقې ته رسیدلي یو. د ۲۰۲۶-۲۰۲۷کال د ملاتړ لپاره اوکراین ته د ۹۰ملیارد یورو (۱۰۶ملیارد ډالرو) د ورکولو پریکړه تصویب شوې ده.»
د اسوشیټیډ پریس په وینا، د اروپايي ټولنې مشرانو د رایې ورکولو څخه مخکې تر نیمې شپې پورې هڅه وکړه چې بلجیم قانع کړي چې له پور ورکړې سره موافقه وکړي.
بلجیم مخکې ویلي وو چې د روسیې د غچ اخیستنې په اړه د اندیښنو له امله به اوکراین ته لوی پور ورنکړي. د اروپايي ټولنې نورو مشرانو بلجیم ته د روسیې د احتمالي غچ اخیستنې څخه د ساتنې لپاره تضمینونه وړاندې کړي دي، چې دا یې خپل وروستي موخې ته نږدې کوي.
د امریکا ولسمشر ډونالډ ټرمپ د ګرینکارټ د بچې اچونې پروګرام درولی. د امریکا د کورني امنیت وزارت ویلي، دغه پرېکړه وروسته له هغې شوې چې د تاوتریخوالي په څو پېښو کې ښکېلو کسانو د همدغه پروګرام له لارې په امریکا کې د اوږدمهاله مېشتېدنې اسناد ترلاسه کړي وو.
د امریکا د کورني امنیت وزیرې کرېستي نوم ویلي، دغه پروګرام هرکال تر ۵۰زره پورې وېزې ورکولې او اوس د ملي امنیت د ساتنې په موخه درېدلی دی. نوموړې ټینګار کړی، چې د دغه پروګرام دوام کولای شي د امریکایانو امنیت له ګواښ سره مخ کړي.
دغه اقدام د ټرمپ د حکومت لهخوا د کډوالۍ د محدودولو په لړ کې نوی ګام بلل کېږي. تر دې وړاندې هم د امریکا حکومت د تاوتریخوالو تر پېښو وروسته، د افغانستان په ګډون د «درېیمې نړۍ» هېوادونو څخه پر کډوالۍ پراخ محدودیتونه لګولي وو.
ورته مهال د امریکا کانګرس ۶۱ غړو د دغه هېواد د بهرنیو چارو او کورني امنیت وزیرانو ته په لیک کې د افغان کډوالو پر وړاندې د ټرمپ د اقداماتو په غبرګون اعتراض کړی. دوی ویلي، د ټرمپ حکومت د ملي ګارد پر سرتېرو د یوه افغان د برید له پېښې «ناوړه ګټه» اخیستې او په ډلهییز ډول یې افغان کډوال مجازات کړي.
د امریکا د کانګرس ۶۱ غړو د دغه هېواد د بهرنیو چارو او کورني امنیت وزیرانو ته یوه لیک کې د افغان کډوالو پر وړاندې د ټرمپ پر اقداماتو اعتراض کړی دی.دوی ویلي، د ټرمپ حکومت د ملي ګارد پر سرتېرو د یوه افغان د برید له پېښې «ناوړه ګټه» اخیستې او په ډلهییز ډول یې افغان کډوال مجازات کړي.
یادو استازو د افغان پناهغوښتونکو نهمنل او په افغانستان کې د امریکا پخوانیو پوځي همکارانو ته د پناه نهورکول «نه جبرانېدونکې تېروتنې» بللې دي. د دوی په وینا، دا ډول اقدامات امریکا د یوه بېباوره هېواد په توګه معرفي کوي.
ډيموکراټ استازو د امریکا د بهرنیو چارو او کورني امنیت وزیرانو ته په لیک کې لیکلي: «له یوې تراژیدۍ ناوړه ګټه اخیستل، ویره او نفاق پارول، د امریکا له امنیت سره مرسته نهکوي.»
یادو استازو ویلي، چې په واشنګټن کې د ملي ګارد پر ځواکونو د ډزو له پېښې وروسته د ټرمپ حکومت نهیوازې د افغانانو د پناهغوښتنې د دوسیو څېړنه درولې، بلکې د هغو افغان پناهغوښتونکو د دوسیو بیاکتنه یې هم پیل کړې، چې مخکې منل شوي و.
د دوی په وینا، د ټرمپ حکومت ان امریکا ته د هغو افغانانو د ننوتلو مخه نیولې، چې د کډوالۍ ځانګړي ویزې لري او په افغانستان کې یې د امریکا له حکومت او پوځ سره کار کړی دی.
د ټرمپ حکومت په تازه اقدام کې افغانستان او ۱۴ نور هېوادونه د بشپړ سفر بندیز په لیست کې شامل کړل او په دې سره د دغو هېوادونو وګړي حق نهلري چې امریکا ته سفر یا د پناه غوښتنه وکړي.
په تازه فرمان کې د کډوالۍ د ځانګړې ویزې (اېسایوي) لرونکي هم د امریکا د حکومت د سفر بندیز له استثنا څخه اېستل شوي دي.
د کانګرس استازو د ټرمپ دغه سیاست «ټولیزه سزا» بللې ده.
هغوی خبرداری ورکړی، چې دا اقدامات د بېګناه او قانون پالونکو خلکو په ځانګړي توګه هغه کسان چې په افغانستان کې یې له امریکايي ځواکونو سره مرسته کړې ژوند له خطر سره مخ کوي.
د هغوی په وینا، «د یوه فرد ویجاړونکي اقدامات باید د ټولو هغو افغانانو د انځور د خرابولو لپاره ونهکارول شي، چې غواړي په امریکا کې په قانوني توګه ژوند وکړي.»
د ټرمپ د حکومت اقداماتو په امریکا کې د افغان کډوالو په منځ کې ویره زیاته کړې ده. د کالیفورنیا ایالت د ساکرامنټو سیمه کې د افغان کډوالو ټولنې ویلي، چې د کډوالو ادارې د افغانانو د نیونې بهیر پراخ کړی دی.
اسوشېتد پریس خبري اژانس راپور ورکړی، چې د لیندۍ له پنځمې راهیسې شاوخوا ۲۴ افغان کډوال، چې زیاتره یې د شمالي کالیفورنیا اوسېدونکي دي، نیول شوي دي. یوازې په تېره اوونۍ کې لږ تر لږه ۹ افغان نارینه هغه مهال ونیول شول، چې د کډوالۍ او ګمرک ادارې ته د خپل وضعیت د څېړنې لپاره مراجعه کړې وه.