د ملګرو ملتونو عمومي منشي د یمن د حوثیانو تر واک لاندې سیمو کې د دغه سازمان د لسو نورو کارکوونکو نیول په کلکه غندلي دي. د ملګرو ملتونو د ویاند په وینا، له نویو نیونو سره د حوثیانو لهخوا د ملګرو ملتونو د نیول شویو کارکوونکو شمېر ۶۹ ته ورسېد.
د ملګرو ملتونو عمومي منشي انتونیو ګوترېش د جمعې په ورځ (د لیندۍ ۲۸مه) په یوې څرګندونه کې د ټولو نیول شویو کسانو د سمدستي او بېقید و شرط خوشې کېدو غوښتنه وکړه. د ملګرو ملتونو ویاند سټیفان دوجارېک ویلي، چې ایران پلوه حوثیانو دا لس کسان پرون (پنجشنبه د لیندۍ ۲۸مه) نیولي دي.
دوجارېک خبرداری ورکړی، چې دغه نیونې د حوثیانو تر کنټرول لاندې سیمو کې د ملګرو ملتونو د بشري مرستو د رسولو بهیر له جدي ستونزو سره مخ کوي. هغه وویل، دا وضعیت په مستقیم ډول پر میلیونونو اړمنو خلکو اغېز کوي او هغوی له ژوند ژغورونکو مرستو محروموي.
ملګرو ملتونو یو ځل بیا د حوثیانو هغه تورونه رد کړي، چې ګواکې د دې سازمان کارکوونکي یا په یمن کې د ملګرو ملتونو فعالیتونه د جاسوسۍ په چارو کې ښکېل دي.
حوثیان له ۲۰۱۴ کال راهیسې د پلازمېنې صنعا په ګډون د یمن ډېره برخه تر خپل واک لاندې لري. دا وروستۍ پېښه د یمن د بشري وضعیت په اړه د نړۍوالو اندېښنې نورې هم زیاتوي.
حوثیانو لا تر اوسه د تازه نیونو په تړاو څه نهدي ویلي.
