د طالبانو د کانونو او پټرولیم وزیر ملا هدایت الله بدري د دایکندي ولایت د مش علیا د مرمر ډبرو تړون، چې ۱۶،۷۴ کیلومټره مربع مساحت لري د یوه افغاني شرکت سره د دېرشو کلونو لپاره لاسلیک کړ. یاد شرکت به د اکتشاف او استخراج په برخو کې ۲۸۳میلیونو افغانیو په ارزښت پانګونه وکړي.
د طالبانو د کانونو او پټرولیم وزارت نن شنبه، د لیندۍ ۲۹مه د یوې خبرپاڼې په خپرولو سره لیکلي، چې ددې ډلې د کانونو او پټرولیم وزیر د یاد تړون د لاسلیک پر مهال وویل چې د دې تړون په لاسلیک سره به د عوایدو سربېره د سیمې خلکو ته کاري فرصتونه برابر شي او دغه راز به د مرمر ډبرو پروسس په هېواد دننه ترسره شي او له پروسس وروسته به بهرنیو هېوادونو ته صادرې شي.
د طالبانو په اعلامیه کې راغلي، چې دا به له ۲۰۰ څخه زیاتو هېوادوالو ته کاري فرصتونه برابر کړي او د سیمې خلکو ته به د ټولنیزو چوپړتیاوو په برخه کې هم کار وکړي.
