سراج الدین حقاني له کندهار وروسته زابل ته د سفر پرمهال د یادې ډلې د مشر ملا هبت الله د فرمانو پر عملي کېدو ټینکار کړی او وايي:«د مشر امیرالمومنین او زموږ و ستاسو د رهبرۍ په فرامینو او هدایاتو کې به انشالله په داسې ځای کې بند نه راځو چې موږ په دې کې د چا څخه د هدایت غوښتنه وکړو.»
د طالبانو د کورنیو چارو وزیر سراج الدین حقاني له کندهار وروسته نن د شنبې په ورځ زابل ولایت ته سفر کړی او د یاد ولایت له سیمه ییزو طالب چارواکو سره په غونډه کې یې د هبت الله اخوندزاده د فرمانونو پر عملي کېدو ټینګار کړی دی.
سراج الدین حقاني ویلي:« د مشر امیرالمومنین او زموږ او ستاسو د رهبری په فرامینو او هدایاتو کې به انشالله په داسې ځای کې موږ بند نه راځو چې موږ په دې کې د چا څخه د هدایت غوښتنه وکړو.»
پر همدغه مهال نوموړي یوځل بیا پر یووالي ټینګار کړی او زیاتوي:«یووالي او وحدت په افرادو کې نه راځي، دا د مشرتابه سره په پوره تعهد او ژمنتیا سره، په ښه اخلاص سره راځي.»
سراج الدین حقاني د افغانستان د امنیت، حریم ساتنې او یووالي ساتنه د ټولو افغانان وجیبه بللي ده.
سره له دې چې د ملګرو ملتونو د امنیت شورا په خپل وروستي راپور کې د ۹۷ سلنې افغانانو ژوند د فقر تر کرښې لاندې بللی، خو سراج الدین حقاني ویلي، چې د افغانستان وضعیت د پرمختګ په لور روان دی او ستونزې ورځ تر بلې کمیږي.
حقاني زیاته کړې:«زموږ او ستاسو ملي پروژي په کار لوېږي او عواید مو هم د خپل هېواد دي. دې ته په کتو چې جنګ ځپلی هېواد مو دی، ستونزې لرو، خو ورځ تر بلې په ځان بسیا کېږو او د هېڅ چا څخه پورړوي نه یوو.»
سراج الدین حقاني یوه اونۍ وړاندې د خوست په مرکزي جومات کې له خلکو سره د طالبانو پر چلند سختې نیوکې وکړي او د طالبانو مشر هبت الله ته د نږدې کړۍ له خوا ورته غبرګون وښودل شو.
نوموړي تېره ورځ په کندهار کې د خلکو په منځ کې راڅرګند شو او نن یې په زابل کې د هبت الله د فرمانونو او لارښوونو پر عملي کېدو ټینګار وکړ.
