د طالبانو د عامې روغتيا وزير نور جلال جلالي د روغتيا نړيوال سازمان له عمومي مشر ټيډرس ادهانوم سره په هند کې لیدلي او په افغانستان کې د پوليو ناروغۍ د تشخيص معياري لابراتوار، روغتيايي سيستم د پياوړتيا او همکاریو د پراختیا لپاره د بدیلو سرچینو په اړه غږېدلي دي.
د طالبانو د عامې روغتیا وزارت نن شنبه، د لیندۍ ۲۹مه ویلي، چې په دې ناسته کې په نړيوالو روغتيايي کنفرانسونو او غونډو کې د افغان روغتيايي مسؤلينو د ګډون په اړه هم خبرې شوي دي.
د طالبانو د عامې روغتیا وزارت لیکلي، چې د روغتيا نړيوال سازمان عمومي مشر ټيډرس ادهانوم وویل، د نړۍ د روغتیايي سیسټمونو د پیاوړتیا په اهمیت ټینګار کوم او ډاډ ورکوم، چې روغتيا نړيوال سازمان به له ټولو غړو هېوادونو سره د روغتیايي خدمتونو د برابرۍ، د ناروغیو د مخنیوي او د ټولنې د روغتیا لا ښه کولو لپاره خپل ملاتړ او همکاري جاري وساتي.
په همدې حال کې د طالبانو د عامې روغتیا وزارت په یوه بله جلا اعلامیه کې ویلي، چې ددې ډلې د عامې روغتیا وزارت تخنیکي ټیم هند هېواد ته د خپل رسمي سفر په ترڅ کې د یاد هېواد د خوړو او درملو سټنډرډ ادارو له مسؤلینو سره جلا ناستې ترسره کړې.
دوی همدراز ویلي، چې د درملو د وارداتو برخه کې باید کیفیت، معیاري توب او مناسب قیمت ته ځانګړې پاملرنه وشي.
بل لوري د هند هېواد د خوړو او درملو اتحادیو مسؤلینو د خوړو او درملو د کیفیت او قیمت برخه کې تخنیکي ټیم ته ډاډ ورکړ او زیاته یې کړه، د معیاري درملو د تولید او صادراتو ترڅنګ چمتو دي، چې د درملو په برخه کې تخنیکي همکاري او هم په افغانستان کې پانګونه وکړي.
