د بلخ ولایت په مزارشریف ښار کې د ۷۴۳ میلیونه افغانیو په ارزښت دسوداګریز مارکېټ د پرانیستې په مراسمو کې، د ریاست الوزرا اقتصادي مرستیال ملا عبدالغني برادر ویلي، نړۍ دې د تحریمونو او بېځایه فشارونو پر ځای له طالبانو سره خپلې اقتصادي اړیکې پراخې کړي.
د بلخ ولایت مقام له خوا په خپره شوې خبرپاڼه کې راغلي، د یاد سوداګریز مارکېټ د پرانیستې په مراسمو کې ملا عبدالغني برادرسره لوړ پوړو طالب چارواکو ګډون کړی و.
د ریاست الوزرا اقتصادي مرستیال، ملا عبدالغني برادر، په خپلو خبرو کې وویل: «موږ د سیمهییزو هېوادونو او نړیوالو څخه غواړو چې د تحریمونو او بېځایه فشارونو پر ځای له طالبانو سره خپلې اقتصادي اړیکې پراخې کړي. یو هوسا او پیاوړی افغانستان د نورو هېوادونو زیان نه دی، بلکې د سیمې او نړۍ د اقتصادي ثبات او هوساینې سره مرسته کوي.»
نوموړي همدارنګه ټینګار وکړ چې د عامه او خصوصي مشارکت له لارې د سترو او اوږدمهاله پروژو پلي کېدل څرګندوي چې په افغانستان کې د پانګونې لپاره مناسب چاپېریال رامنځته شوی او پانګوال کولی شي له شته فرصتونو ګټه واخلي.
په خبرپاڼه کې راغلي، د بلخ والي، ملا محمد یوسف وفا، د ولایتي پرمختیايي پروژو یادونه وکړه او ویې ویل: «د ولایت مسولیت یوازې د ولس د سر او مال ساتنه نه ده، بلکې د خلکو د اقتصاد پیاوړتیا، د خدماتو وړاندې کول او د اسانتیاوو رامنځته کول هم د حکومت له اساسي دندو څخه دي.»
د مارکېټ د پراختیا په اړه د بلخ والي وویل: «د اوقافي سوداګریز مارکېټ پروژه به سلګونو کسانو ته د کار زمینه برابره کړي او زرګونو نورو ته به په تجارتي برخه کې د عاید فرصتونه رامنځته کړي.»
د یادونې وړ ده چې دغه اتهپوړیز مارکېټ چې ۸۷۰دوکانونه لري، په دوو کلونو کې به بشپړ شي او هر کال به د اجارې له لارې ۴۳ میلیونه افغانۍ د اسلامي امارت خزانې ته وسپارل شي.
