د طالبانو د کار او ټولنیزو چارو وزارت وايي، په افغانستان کې بېکاري یوه جدي او نهانکارېدونکې ستونزه ده، خو ټینګار کوي چې د دې ستونزې د راکمولو لپاره د بېلابېلو پروګرامونو د پلي کېدو هڅې روانې دي. نړیوال بانک په خپل تازه رپوټ کې د افغانستان د بیکارۍ کچه ۲۵ سلنه ښودلې ده.
د طالبانو د کار او ټولنیزو چارو وزارت معیین نن د دوشنبې په ورځ، د مرغومي پر لومړۍ نېټه د یادې ډلې د سکټوري وزارتونو او ادارو د همغږۍ په ناسته کې وویل، چې په هېواد کې د بېکارۍ له ستونزې انکار نه شي کېدای، خو دوی په ځانګړې توګه د کار او ټولنیزو چارو وزارت، ژمن دی چې د بېکارۍ د کچې د راټیټولو لپاره د بېلابېلو برنامو د تطبیق له لارې اغېزناک ګامونه واخلي.
په دې ناسته کې د صنعتکارانو او راستنېدوکو کډوالو لپاره په بېلابېلو ولایتونو کې د ځمکو د وېش د څرنګوالي، داخلي او بهرنیو وګړو ته د کار د جواز او نورو مسایلو په تړاو خبرې وشوې.
د یادې ناستې پرمهال د طالبانو د کار او ټولنیزو چارو وزیر عبدالمنان عمري ویلي چې له راستنېدونکو کډوالو متخصص او د کار وړ کسان د وزارت په معلوماتي بانک کې ثبت شوي او هغه کسان چې له زده کړو پاتې دي، د فني او حرفوي زده کړو مرکزونو، مدرسو او ښوونځیو ته د مسلک او زده کړې د ترلاسه کولو په موخه ورپیژندل شوي دي.
د شنونکو په باور، د طالبانو د سیاستونو له امله، چې بانکي سسټم او را کړې ورکړې له ستونزو سره مخ دي، افغانستان د کاري فرصتونو له کمښت او د خلکو د عایداتي سرچینو له محدودېدو سره مخ دی. د کاري فرصتونو نشتوالی د دې لامل شوی، چې ګڼ افغانان د ژوند د ښه والي په هیله له هېواده د وتلو خطرناکې لارې وټاکي او یا هم پر ناقانونه لارو د ګاونډیو هېوادونو پر لور مهاجرت ته مخه کړي.
د نړیوال بانک د معلوماتو له مخې، په افغانستان کې د بېکارۍ کچه شاوخوا ۲۵ سلنې ته رسېږي، چې دا کچه د هېواد د اقتصادي وضعیت د خرابوالي ښکارندویي کوي.
له بلې خوا، پر طالبانو نیوکې کېږي، چې د دولتي ادارو دندې تر ډېره خپلو پلویانو او نږدې کسانو ته ورکوي او د شفافې استخدامي پروسې نشتوالی د دې لامل شوی، چې ډېر مسلکي او لوستي کسان له کاره بېبرخې پاتې شي.
سره له دې، د طالبانو د کار وزارت ټینګار کوي، چې د فني او حرفوي زده کړو، د کارموندنې د ثبت سیستمونو او د بېلابېلو پراختیایي پروګرامونو له لارې به د خلکو لپاره د کار زمینه برابره کړي.
