په هرات کې د صنعتي دستګاوو د یوې کارخونې مسوولین وايي، چې په لومړي ځل یې له افغانستان څخه تاجکستان ته صنعتي کارخونو او کانونو اړوند بېلابېلې دستګاوې صادرې کړې دي. ددغو صنعتي ماشین الاتو او دستګاوو ارزښت تر ۳۵۰ زره امریکايي ډالرو رسیږي.
په هرات کې د وسپنیزو دستګاوو تولیدي کارخونې یو تن مسوول معروف محمدي د طالبانو تر واک لاندې ملي ټلوېزیون ته وویل، چې هڅې روانې دي ددې دستګاوو د خرڅلاو لپاره له ځینو نورو هېوادونو سره تړونونه وشي.
نوموړی وايي، چې له تولید شویو دستګاوو نه د پولادي کانونو، سیمنټو، اوسپنې، ګچ او کانونو په صنعتي کارخونو کې ګټه اخیستل کېږي.
د طالبانو د صنعت او سوداګرۍ وزارت مرستیال احمد الله ذاهد وايي، چې د صنعت په برخه کې پرمختګونه روان دي او د دوی هڅه کوي د خصوصي سکتور ملاتړ نور هم زیات کړي.
په ورته مهال په هرات کې د صنایعو او کانونو خونې رییس عبدالناصر امین وايي، چې اوس مهال په هرات کې داسې شرکتونه شته چې ۵۱ بهرنیو هېوادونو ته صادرات لري.
