د طالبانو د تر واک لاندې ملي پراختیا شرکت وایي، چې د غوري سیمنټو فابریکې ځینې برخې ترمیم او رغول شوې، چې له دې امله د فابریکې ورځنی تولید ۷ سوه ټنو ته رسیږي. دوی همدراز زیاتوي، چې د غوري سمنټ فابریکه کې څلور شفټه کار کېږي.
د طالبانو تر واک لاندې د ملي پراختیا دولتي شرکت ویاند نبي الله ارغندیوال ملي ټلوېزیون ته ویلي، چې په بغلان کې د غورې سیمنټو فابریکې د درېیم فاز د جوړېدو چارې په چټکۍ سره روانې دي او ددې فاز په بشپړېدو سره به د تولید کچه ۵ زره ټنو ته ورسیږي.
دوی زیاتوي چې اوس مهال د سیمنټو فابریکو تولید د بازار ۵ سلنه اړتیا پوره کوي خو که درېیم فاز یې ګټې اخیستنې ته چمتو شي نو د بازار اړتیا به پوره کړي.
د ملي پراختیا شرکت وايي، اوس مهال په کندهار، پروان، جوزجان، هرات او لوګر کې د سیمنټو د کانونو پر ۵ لویو پروژو کار روان دی چې پانګونه یې نژدې ۸ سوه میلیونه ډالرو ته رسیږي.
