سندرغاړي فرهاد دریا د امستردام په کنسرت کې د یو ګډونوال د «سیاسي څرګندونو» د مخنیوي په اړه د خلکو د غبرګون ځواب کې وویل، کنسرټ د ښې یا بدې سیاسي بیانیې ځای نه، بلکې د موسیقۍ ځای دی. نوموړي له دې ګډونوال سره د خپل چلند دفاع کې زیاته کړه، دا اقدام د طالبانو د ملاتړ معنا نه لرله.
فرهاد دریا د سېشنبې په ورځ (د مرغومي ۲مه) په خپل انسټاګرام لایف کې وویل: «طالبان زموږ د وینې، زموږ د موسیقۍ او د خلکو د وینې تږي دي. هغوی زموږ سازونه وسوځول، موږ یې ووهلو، زندانونو ته یې واچولو او د موسیقۍ خلک یې بېځایه کړل.»
نوموړي دغه څرګندونې تر هغه وروسته وکړې، چې د ده یو مینهوال او پخواني خبریال د ستیج پر سر د یادګار په توګه د خولۍ د اخیستو پرمهال ناڅاپه سیاسي وینا پیل کړه. ښاغلي دریا او د هغه ساتونکو ژر مایک ترې واخیست او هغه یې له ستیج څخه ښکته کړ، چې دغه چلند د همدې کس په ګډون د ټولنیزو رسنیو د ګڼو کاروونکو توند غبرګونونه راوپارول او ځینو فرهاد دریا د طالبانو په ملاتړ تورن کړ.
دغه کنسرت چې دوه ورځې مخکې په امستردام کې ترسره شو، یاد خبریال په خپلو خبرو کې وویل: «هیله لرم چې داسې کنسرټونه به یوه ورځ په کابل او ان د طالبانو د امر بالمعروف په اداره کې هم ترسره شي.»
دریا بیا خپلو مینهوالو ته په وینا کې وویل: «سیاسي بحثونه که هر څومره هم د یو ملت په ګټه وي، د کنسرټ پر ستیج د مطرح کېدو ځای نهلري. د سیاسي مسایلو لپاره جلا تریبیونونه شته.»
دا په داسې حال کې ده، چې فرهاد دریا په دې وروستیو کې په بېلابېلو اروپایي هېوادونو کې پرلهپسې کنسرټونه ترسره کړي او د دغو هنري پروګرامونو له لارې یې له خپلو مینهوالو سره لیدنې کړې دي. نوموړي په دغو کنسرټونو کې د موسیقۍ ترڅنګ د سولې، انسانیت او فرهنګي ارزښتونو پر اهمیت هم ټینګار کړی او هڅه یې کړې، چې د هنر له لارې د افغانانو غږ نړۍ ته ورسوي.
