افغانستان انټرنشنل ـ پښتو
د سندونو له مخې د طالبانو تر واک لاندې د افغاني سرې میاشتې ټولنې مشر شهاب الدین دلاور له ننګرهار څخه د یو روغتون ودانۍ پلان او د غزني د خلکو لپاره مرستې د لوګر ولایت مرکز پل عالم بابوس کلي ته لېږدولي دي. د سرچینو په خبره، دلاور بهرنۍ موسسې اړ باسي، چې مرستې لوګر ولایت کې وویشي.
د ترلاسه شو سندونو له مخې د طالبانو سرې میاشتې ټولنې عمومي مشر شهاب الدین دلاور په امر یو مکتوب د روان کال د اپریل میاشت کې د قطر د سرې میاشتې ټولنې ته لېږل شوی دی.
په دې مکتوب کې غوښتنه شوې ده، چې د قطر سرې میاشتې ټولنې په مالي لکښت یو روغتیايي مرکز ودانۍ د جوړېدو پلان او د هغه ټول تجهیزات دې د لوګر ولایت مرکز پل عالم د نوموړي خپل پلارني کلي بابوس ته انتقال شي.
سرچینو افغانستان انټرنشنل - پښتو ته وویل، چې دا روغتیايي مرکز په ننګرهار کې جوړېدو خو دا کار د طالبانو د سرې میاشتې ټولنې د مشر شهاب الدین دلاور له غبرګون سره مخ شو او په مکتوبي توګه یې د قطر له سرې میاشتې ټولنې غوښتنه وکړه، چې د روغتیايي مرکز او تجهیزات یې د نوموړي خپلې ولسوالۍ ته انتقال شي.
دوی همدراز زیاتوي، چې د قطر سرې میاشتې ټولنې په ننګرهار کې د افغان کډوالو لپاره په طبي تجهیزاتو سمبال روغتون جوړ کړي خو د شهاب الدین دلاور د مخالفت له امله دا پروژه نه ده عملي شوې.
د یو بل سند له مخې د روان کال د سپټمبر میاشتې کې د ترکیې هېواد د افغانستان په یوولسو ولایتونو خوراکي توکي وویشي، چې په دې ولایتونو کې لوګر شامل نه و.
د رارسېدلي سند له مخې شهاب الدین دلاور، غزني ولایت له نوملړ څخه لرې کوي او پرځای یې لوګر ولایت شاملوي.
په دې وروستیو کې د طالبانو د سرې میاشتې عمومي رییس شهاب الدین دلاور د فساد په اړه راپورونه زیات شوي دي.
تیره ورځ افغانستان انټرنشنل - پښتو د سندونو له مخې راپور خپور کړ، چې د طالبانو تر واک لاندې د افغاني سرې میاشتې ټولنې عمومي مشر شهاب الدین دلاور د خپلې لور خسر «مولوي حفیظ الله» په سره میاشت ټولنه کې په لومړی بست کې د خپل مشاور په توګه ټاکلی دی. سرچینې وايي، چې مولوي حفیظ الله د سرې میاشتې د قراردادونو په فساد کې پراخ لاس لري.
د روان کال د مرغومي پر ۲مه افغانستان انټرنشنل - پښتو داسې سندونه ترلاسه کړل، چې له مخې د طالبانو تر واک لاندې د افغاني سرې میاشتې ټولنې عمومي مشر شهاب الدین لاور خپل زوم شکرالله شاکر په خپله اداره کې د یوه کال په موده کې څوځله پر بېلابېلو څوکیو ګومارلی دی. په یوه مکتوب کې لیدل کیږي چې شکرالله شاکر ځان پخپله د خپل خسر د دفتر رییس ټاکلی دی.
له وړاندې هم افغانستان انټرنشنل ـ پښتو ته رسېدلو سندونو کې ښودل شوې، چې د طالبانو د افغاني سرې میاشتې ټولنې مشر شهاب الدین دلاور خپل څو تنه نژدې کسان له کانونو وزارت څخه بېولي او په دې ټولنه کې یې مقرر کړي دي.
دا په داسې حال کې ده، چې د ملا هبت الله د فرمانونو او حکمونو د تعقیب او نظارت ریاست څه موده وړاندې د طالبانو ټولو ملکي او نظامي ادارو ته لارښوونه کړې وه، چې د دې ډلې د مشر له فرمان څخه اطاعت وکړي، چې وايي، « د خپلوۍ او انډيوالۍ پر بنسټ دې په ادارو کې څوک نه ګوماري».
په دغه مکتوب کې، چې افغانستان انټرنشنل - پښتو ته هم رسېدلی و، ویل شوی وو، چې «د خپلوۍ له مخې د اشخاصو ګومارل د الله د نارضایتۍ او عذاب سبب کیږي»
