د ایران د پارلمان د صنایعو او کانونو د کمیسیون یوه غړي ویلي دي، چې د طالبانو له کانونو وزارت سره یې د افغانستان د اوسپنې کان د اکتشاف، استخراج او پروسس په اړه خبرې کړې دي. امیر توکلی رودي وايي، چې په دې کې د سون توکو په توګه د افغانستان د ډبرو سکرو کارول هم شامل دي.
د طالبانو ادارې د ۱۴۰۲ کال په لړم میاشت کې اعلان کړی و، چې هره ورځ ۱۰۰۰ ټنه د ډبرو سکاره د افغانستان په شمال کې استخراج کیږي او پر سوداګرو پلورل کېږي.
طالبانو د افغانستان د ډبرو سکرو د استخراج او صادراتو زیاتوالي ته په اشارې سره دا هم ویلي و، چې د پاکستان د ډبرو سکرو د ورځنیو اړتیاوو ۱۰ سلنه هم پوره کوي.
په همدې حال کې د روان کال د غبرګولي میاشت کې پاکستاني رسنیو راپور ورکړ چې له افغانستان څخه پاکستان ته د ډبرو سکرو او صابون ډبرو واردات بند شوي دي.
په وروستیو میاشتو کې د طالبانو او پاکستان ترمنځ د تاوتریخوالي زیاتوالي د دې لامل شوی، چې دغه ډله ایران او د مرکزي اسیا هیوادونو ته خپله سوداګریزه لاره بدله کړي.
د ایران د پارلمان د صنایعو او کانونو د کمیسیون غړي امیر توکلی رودي د ایران او افغانستان ترمنځ د ګډ اقتصادي او کاني زون جوړولو پلان ته هم اشاره وکړه او ویې ویل چې د دې پلان اصلي هدف د دواړو هیوادونو ترمنځ د سوداګریزو اړیکو پراخوالی، دوامداره امنیت پیاوړی کول او د پولې پر دواړو خواوو پانګونې ته وده ور کول دي.
هغه افغانستان ته د تخنیکي پوهې، ټکنالوژۍ او انجینرۍ خدماتو لیږد ته په اشارې وویل چې په دې برخه کې په افغانستان کې څو ګډې غونډې شوې او د پولې دواړو غاړو ته د صنعتي زونونو لپاره دوه سیمې ټاکل شوې، چې ټول مساحت یې شاوخوا ۱۰۰۰ هکتاره ځمکه ده.
د ایران د پارلمان د صنعت او کانونو کمیسیون غړي ویلي دي، چې که ایران د افغانستان له اقتصادي فرصتونو ډډه وکړي، نو د ترکیې، چین او نورو په څېر هیوادونه به له دې فرصتونو ګټه واخلي.
د طالبانو پلاوي، چې ددغې ډلې د بهرنیو چارو وزارت د لومړي سیاسي رییس مفتي نور احمد نور په مشرۍ یې د ډسمبر پر ۲۶مه ډاکې ته سفر کړی، د بنګله دېش د جماعت اسلامي ګوند له مشرانو سره لیدنې کړې دي.
د شنونکو په باور، طالبان غواړي د بنګله دیش د راتلونکې فبروري له ټاکنو وړاندې ددغه هېواد له جماعت اسلامي او نورو مذهبي ګوندونو سره خپلې اړیکې ورغوي.
د بنګلهدېش-افغانستان د سوداګرۍ خونې رییس ابو صایم خالد فرانس پرېس خبري اژانس ته وویل چې د نور احمد نور د سفر موخه د سوداګریزو اړیکو پراخول هم وو.
د اسلامي حزب «خلافت مجلس» مشر مامونالحق وویل چې نور د بنګلهدېش په سفر کې د هغه مدرسه هم لیدلې ده.
هغه وویل: «دا یوه د درناوي لیدنه وه، ځکه موږ د هېواد له تر ټولو لویو مدرسو څخه یوه پرمخ وړو. هغه نورې مدرسې هم وکتلې».
د بنګلهدېش موقتي حکومت، چې د سولې نوبل جایزې ګټونکي محمد یونس په مشرۍ په واک کې دی، تر اوسه د دغه سفر په اړه څه نه دي ویلي. د بنګله دېش د بهرنیو چارو وزارت یوه چارواکي ویلي چې د نور سفر شخصي و.
بنګلهدېش د شاوخوا ۱۷۰ میلیونه خلکو هېواد دی، چې زیاتره یې سني مسلمانان دي او د ۲۰۲۴ کال له پراخ پاڅون وروسته، چې د پخوانۍ صدراعظمې شېخ حسینه واکمني پرې پای ته ورسېده، لومړنیو ټاکنو ته تیاري نیسي.
د بنګلهدېش لوی اسلامي ګوند، جماعت اسلامي د حسینې د ۱۵ کلنې واکمنۍ پر مهال له بندیزونو او امنیتي عملیاتو وروسته غواړي د رسمي سیاست برخه شي.
د طالبانو او تر بندیز لاندې وسلهوالې ډلې «حرکت الجهاد الاسلامي بنګلهدېش» ترمنځ اوږدمهالې اړیکې شته، چې ځینو غړو یې د شوروي پر وړاندې په افغانستان کې جګړه کړې ده.
همدارنګه د «حفاظت الاسلام» مشرانو، چې د اسلامي مدرسو او ټولنو مهم ایتلاف دی، تېر کال افغانستان ته سفر کړی و او د طالبانو د حکومتدارۍ سیستم یې د قاعدو پر اساس منلی و.
د بنګلهدېش د زدهکوونکو ګوند، چې د تېرو اعتراضونو له لارې یې د صدراعظمې شېخ حسینه واکمني لرې کړه، د راتلونکې فبروري له پارلماني ټاکنو مخکې له اسلامپال جماعت اسلامي سره انتخاباتي ایتلاف جوړ کړی.