د بدخشان په واخان کې د «پامیر» په نوم د نوې ولسوالۍ اداري چارې رسماً پیل شوې

د غزني ولایت لپاره د طالبانو د رسنیو دفتر د شنبې په ورځ (د مرغومي ۱۳مه) په یوه خبرپاڼه کې ویلي، چې د بې‌کیفیته او ناقانونه تېلو، نفتو او مایع ګازو د مخنیوي کمېټې ټولو سوداګرو او د نفتي موادو پلورونکو ته جدي خبرداری ورکړل شوی، چې د بې‌کیفیته تېلو له واردولو او پلورلو ډډه وکړي، ترڅو د وسایطو او ماشینونو له تخریب، د چاپېریال له ککړتیا او د عامو خلکو له اقتصادي زیانونو مخنیوی وشي.

یاده کمېټه د هبت‌الله اخوندزاده د حکم پر بنسټ د غزني د ځايي طالب مسوولینو په ګډون جوړه شوې ده.

په خبرپاڼه کې ویل شوي: «د بې‌کیفیته تېلو له نیول کېدو وروسته پرېکړه به د هبت‌الله اخوندزاده د حکم مطابق او مرستیال والي سره په مشوره وشي او اړین اقدامات به ترسره شي».

د یادونې وړ ده، چې په ښارونو او په ځانګړې توګه په لویو ښارونو کې د هوا د ککړتیا یو له اصلي لاملونو په موټرو کې د بې‌کیفیته تېلو کارول په ګوته شوي او همداراز د افغانستان د اړتیا وړ ډېری تېل له ګاونډیو هېوادونو څخه راواردېږي.

د طالبانو له پېښو سره د مبارزې چمتووالي ادارې رييس نورالدین ترابي د شنبې په ورځ (د مرغومي ۱۳مه) د هندیکپ انټرنشنل موسسې ترمنځ د څه باندې ۴۹۱ زره ډالرو په ارزښت د ګډو همکاریو د هوکړې د لاسلیک پر مهال وویل: «موږ د موسسو پر وړاندې هېڅ ډول محدودیت نه‌دی رامنځته کړی او تمه لرو چې هغوی به خپلې پروژې په شفاف او چټک ډول پلي کړي او د تمویلوونکو له لوري به لا زیاته بودیجه هم جلب کړي».

د دغه طالب چارواکي دغه ادعا په داسې حال کې ده، چې په تېرو څه باندې څلورو کلونو کې یو زیات شمېر مرستندویه بنسټونو د طالبانو د ډول ډول فشارونو او په چارو کې یې د لاسوهنو له امله په افغانستان کې خپل فعالیتونه درولي دي. دغه وضعیت بیا د افغان اړمنو کورنیو ورځنی ژوند ټکنی کړی دی.

نورالدین ترابي یو ځل بیا له مرستندویه موسسو وغوښتل، چې د پروژو په چوکاټ کې خپل اداري لګښتونه راکم کړي او زیاته یې کړه: «دوه اړخیز اخلاص د دواړو لوریو د دوامدارو همکاریو تضمین کوونکی دی».

د چارو د شنونکو په باور، د افغانستان لپاره د بهرنیو مرستندویه بنسټونو له لوري له راټولو شویو مرستو ډېره برخه یې اړوندې موسسې پر خپلو اداري او امنیتي چارو لګوي او کمه برخه یې بیا تر اړمنو رسول کېږي.

له دې سره سم، د طالبانو د اقتصاد وزیر یو ځلي ویلي و چې د بهرنیو موسسو معاشونه او اداري لګښتونه لوړ دي او له اقتصادي اړخه د خدمتونو د وړاندې کولو او پروژو د اغېز کمېدو لامل ګرځي.

د هندیکپ انټرنشنل موسسې به د یادې هوکړې له‌مخې بشري مرستو ته ګودامونه او همداراز د لېږدونې لپاره یې ټرانسپورټي خدمات برابر کړي، د پروژې اړوندو کارکوونکو ته به د ظرفیت لوړونې پروګرام او په هرات کې د ناچاودو توکو په اړه د عامه پوهاوي پروګرام جوړ کړي.

د طالبانو د کار او ټولنیزو چارو وزارت د شنبې په ورځ (د مرغومي ۱۳مه) د یوې خبرپاڼې په خپرولو سره ویلي، محمد زاهد احمدزي په کونړ کې له تخنیکي او مسلکي زده‌کړو د یو شمېر ځوانانو په فراغت غونډه کې زیاته کړه، چې اوس موسسو ته د بشري فعالیتونو لپاره لازم فرصتونه برابر شوي دي.

محمد زاهد احمدزي زیاته کړه: «پر همکارو مؤسساتو غږ کوم، دا چې دوی ته لازم فرصت برابر شوی دی، هڅه دې وکړي چې ټولو لرو پرتو سیمو په خاص ډول کونړ ولایت کې دې خپل خدمات پراخ او ګړندي کړي».

خو یو شمېر مرستندویه بنسټونو تل په خپلو چارو کې د طالبانو له لاسوهنو شکایت کړی او ان ځینو بنسټونو په افغانستان کې خپل فعالیتونه هم درولې دي.

په دې فراغتغونډه کې د کونړ د علماوو شورا رييس عبدالقهار صدیقي وویل، د حکومت مسوولیت په هره برخه کې د اسانتیاوو برابرول او د ولسونو مسوولیت ورڅخه سالمه ګټه اخیستنه ده او په دې کې د یوې بریالۍ ټولنې د پرمختګ راز نغښتی دی.

د یادونې وړ ده، چې نن د کونړ له تخنیکي او مسلکي زده‌کړو ۳۶۸ کسان د خیاطۍ په برخه کې تر شپږو میاشتنیو نظري او عملي زده‌کړو له ترلاسه کولو وروسته فارغ او پر هغوی کاري وسایل او تایید نامې ووېشل شوې.

ندا محمد ندیم د شنبې په ورځ (د مرغومي ۱۳مه) په کابل کې د یوې دیني مدرسې فراغت غونډه کې د وینا پر مهال ویلي، چې طالبان یو لوی امتحان سره مخ دي.

نوموړي زیاته کړه: «نن چې موږ په کوم حالت کې یو، دا یو ډېر دروند امتحان دی؛ واک، موټر، پیسې او عزت راسره دي. خلک او نړۍ راته متوجه دي او پر بېلابېلو لارو د رشوت هڅې روانې دي. بېلابېل اسباب راته مخامخ دي. نو اړتیا ده چې خدای مو په دې اوسني مسوولیت کې بریالي کړي. د دیني عالمانو لارښوونو ته اړتیا لرو.»

نوموړي دا څرګندونې پر داسې مهال وکړې، چې پر یو شمېر طالب مشرانو له واک نه د ناوړه استفادې تورونه دي.

د راپورونو له‌مخې، ګڼ طالب مشران په پراخ فساد کې لاس لري او ځیني نور طالب مشران هڅه کوي، چې په خپلو لیکو کې د فساد او واک څخه د ناوړه استفادې مخنیوي وکړي.

د ترلاسه شوي تعهد لیک له مخې چې د ننګرهار د پوهنې ریاست اړوند کارمندان او د ښوونځیو ښوونکي او زده کوونکي مکلف دي، چې د طالبانو د مشر ملاهبت الله د فرمان او حکم له مخې ځان د اسلامي امورو اطاعات او په نبوي سیرت باندې برابر کړي.

دوی لیکلي، چې کوم ښوونکي او زده کوونکي د ملا هبت الله له فرمان او حکم څخه سرغړونه وکړي، نو په حاضرۍ کې غیر حاضر کړئ ترڅو دوی اړ شي چې فرمان پر ځان عملي کړي

ځینو ښوونکو افغانستان انټرنشنل - پښتو ته وویل، چې دا پروسه د ننګرهار ولایت مرکز جلال اباد ښار په عبدالوکیل علي لېسه کې ادامه لري.

دوی وايي، د طالبانو د پوهنې وزارت ددې لپاره یوه ځانګړې کېمټه جوړه کړې ده، په دې اقرار او تعهد خط کې دا پرې لاسلیکوي، که چیرې دوی ځانونه پر سنت او ږېرې پرې نه ږدي نو له دندو شړل کېږي او بیا د شکایت حق نه لري.

د طالبانو د امربالمعروف او شکایتونو اوریدو وزارت د غوايي په میاشت کې په اېکس خواله رسنۍ کې ولیکل، چې ږیره خریل د خدای تعالی له طبیعي جوړښت څخه انکار دی او خلک باید له دغه ګناه څخه ځانونه وساتي.

ددې ادارې طالب ویاند سیف الاسلام خېبر وویل چې خلک باید ږیري پرېږدي او د خریلو له ګناه یې ځانونه وساتي.

هغه سره له دې چې دا چاره خطا ګڼي، وايي ږیره پرېښودل د ښځینه او نارینه وو ترمنځ د توپیر لویه بېلګه هم ګڼي.

له دې وړاندې د طالبانو د امربالمعروف محستبانو نایانو ته خبرداری ورکړی، چې د ږیري له خریلو، ډولي ږیرو جوړولو، فېشني ویښتانو جوړولو او د نارینه وو له سینګارولو څخه به ډډه کوي.

دغو محتسبانو په کابل، ننګرهار او خوست سربېره په یو شمېر ولایتونو کې څو څو ځله نایان له دې کبله نیولي چې ګوندې د خلکو ږیرې یې خریلي دي.

د روانې مرغومي میاشتې کې په خوست ولایت کې د بېلابېلو دولتي ادارو یو شمېر پخواني مامورینو افغانستان انټرنشنل -پښتو ته ویلی، چې د طالبانو د امربالمعروف او نهی عن‌المنکر ریاست له لوري د ږېرو د بڼې له امله لومړی ۲۴ ساعته زنداني کیږي او بیا یې په دې پلمه له دندو ګوښه کوي، چې ږیرې یې د «سنت مطابق» نه دي.