د طالبانو د سرحدي پولیسو ویاند وايي، په تېرو شپږو میاشتو کې یې له افغانستان څخه ګاونډیو هېوادونو ته د ګران بیه توکو د قاچاق او له ګاونډیو هېوادو څخه یې افغانستان ته د نشهيي توکو د واردولو په تور ۱۳۲ کسان نیولي دي.
د طالبانو د سرحدي پولیسو ویاند عابدالله فاروقي ویلي، چې په تېرو شپږو میاشتو کې یې د ایران، ازبکستان، تاجکستان او پاکستان سره په بندرونو کې د قاچاقو د مخنیوي په موخه ۱۰۲ عملیاتونه ترسره کړي او په پایله کې یې ۱۳۲ کسان نیول شوي دي.
عابدالله فاروقي زیاته کړې: «زموږ منسوبینو په ۱۰۲ هدفمندو عملیاتو کې ۱۳۳ تنه کسان نیولي دي. زموږ منسوبینو د ایران، ازبکستان او تاجکستان سره پر پوله او له پاکستان سره پر ډیورنډ کرښې په بندرونو کې هېواد ته د نشهيي توکو او زرګونه ټابلیټونو د قاچاق هڅې شڼدې کړې دي.»
نوموړي ویلي، چې له افغانستان څخه بهرنیو هېوادونو ته یې د ګران بیه توکو او تاریخي سېکو د قاچاق مخنیوی هم کړی دی.
فاروقي زیاته کړې: «د تاریخي اثارو او قیمتي توکو د قاچاق مخنیوی هم شوی دی، په دې لړ کې پنځوس زره امریکايي ډالر، شاوخوا لس کیلوګرامه سره او سپین زر، ۳۵ دانې ګران بیه غاړهکۍ او ګوتمۍ او د سلګونو تاریخي سېکو د قاچاقو مخنیوی هم شوی دی.»
دا په داسې حال کې ده، چې څه موده وړاندې د طالبانو سرحدي پولیسو ویلي و چې په تېرو څلورو کلونو کې یې د ۹۲۱ بېلابېلو تاریخي اثارو د قاچاقو مخه نیولې ده.
د طالبانو په خبره، قاچاقکوونکو غوښتل چې مجسمې، سېکې، مډالونه او نور تاریخي اثار د ځمکې او هوا له لارې بهرنیو هېوادونو ته قاچاق کړي.
