د کړکېچ نړیوالې ډلې(ای سي جي)په خپل تازه رپوټ کې ویلي، چې که په راتلونکې کې پر پاکستان هر ډول وسلهوال برید وشي او د بریدګرو پل په افغانستان کې وموندل شي، پاکستان به پرې جدي غبرګون وښيي.
په رپوټ کې ویل شوي، چې د پاکستان بهرنۍ اړیکې له ګاونډیو هېوادونو سره د دوامداره تاوتریخوالي له امله لا هم نازکې او پېچلې دي.
د کړکېچ نړیوالې ډلې خبرداری ورکړی، چې د وسلهوالو ډلو بل لوی برید کولای شي د پاکستان او د سیمې د نورو هېوادونو ترمنځ نازک توازن ګډوډ کړي او په سویلي اسیا کې بېثباتي نوره هم زیاته کړي.
رپوټ زیاتوي، چې اسلاماباد د کرښې هاخوا د وسلهوال فعالیت په اړه ډېر حساس شوی دی.
رپوټ وايي، چې که د پاکستان چارواکي کوم نوی برید د افغانستان له خاورې سره ثابت کړي، نو د سیاسي یا امنیتي سخت غبرګون احتمال ډېر لوړ دی.
د کړکېچ نړیوالې ډلې په باور، دا ډول وضعیت کولای شي د پاکستان او افغانستان اړیکې لا ترینګلې کړي او حتا نور سیمهییز لوبغاړي هم پکې ښکېل کړي.
په ورته وخت کې رپوټ یادونه کوي چې پاکستان په تېر یوه کال کې له امریکا سره د خپلو اړیکو د ښه کولو هڅې زیاتې کړې دي. دا ډیپلوماټیکې هلېځلې د اسلاماباد د هغې پراخې ستراتېژۍ برخه بلل کېږي، چې د سیمهییزو امنیتي فشارونو تر څنګ له مهمو نړیوالو قدرتونو سره د اړیکو پر پیاوړتیا تمرکز لري.
د رپوټ له مخې، د پاکستان د مشرانو او واشنګټن ترمنځ د لوړې کچې څو لیدنې شوې دي. ویل شوي، چې جنرال عاصم منیر او د پاکستان لومړي وزیر شهباز شریف په سپینه ماڼۍ کې د امریکا له ولسمشر ډونالډ ټرمپ سره څو ځله لیدلي، چې دا له امریکا سره د اسلام اباد د ستراتېژیک باور او همکارۍ د بیا رغولو هڅې ښيي.
سره له دې ټولو هڅو، کړکېچ نړیوال ډله خبرداری ورکوي چې دوامدار وسلهوال ګواښونه او سیمهییز رقابتونه لا هم د ثبات پر وړاندې جدي خنډونه دي.
د رپوټ پایله دا ده، چې که د کرښې هاخوا د وسله والو ډلو د مهار لپاره اغیزناک میکانېزمونه جوړ نه شي او سیمهییز ډیالوګ پیاوړی نه شي، نو سویلي اسیا به په نږدې راتلونکي کې له لا زیات کړکېچ او نه اټکلېدونکو امنیتي پایلو سره مخ شي.
