د بنګلهدېش موقت حکومت د دوشنبې په ورځ اعلان وکړ، چې د هند د کرېکټ د غوره لیګ (IPL) د نوي فصل د سیالیو خپرول یې منع کړي. دا پرېکړه د بنګلهدېش او هند ترمنځ د اړیکو د خرابېدو په لړ کې یوه نوې شخړه بلل کېږي، چې اوس یې تر ورزش او کرېکټ پورې اغېز رسېدلی دی.
دا اقدام وروسته له هغه کېږي، چې د هند کرېکټ بورډ پرېکړه وکړه چې د بنګلهدېش د ملي لوبډلې لوبغاړی مصطفیضالرحمان چې د راتلونکي فصل لپاره یې د کلکتې نایټ رایډرز لوبډلې سره تړون لاسلیک کړی و، له لوبډلې وباسي.
په ورته وخت کې، بنګلهدېش اعلان کړی چې نه غواړي د راتلونکې میاشتې د شلاوریز نړۍوال جام سیالیو چې ټاکل شوې په هند کې ترسره شي، برخه واخلي. دغه هېواد غوښتنه کړې، چې دا لوبې سریلانکا ته ولېږدول شي، کوم چې د دې ۲۰ اوریزه سیالیو له ګډو کوربه هېوادونو څخه دی.
د بنګلهدېش د اطلاعاتو او رسنیو وزارت په یوه بیان کې د مصطفیضالرحمان په څېر د «یوه ستوري لوبغاړي» د هند غوره لیګ سیالیو څخه لرې کول «له منطق څخه لرې» بللی او ویلي یې دي، چې دې پرېکړې د خلکو احساسات ژوبل کړي دي.
د هند د کرېکټ غوره لیګ چې د نړۍ تر ټولو شتمنې شلاوریزه سیالۍ بلل کېږي، ټاکل شوې ده د مارچ له ۲۶مې د مې تر ۳۱مې پورې ترسره شي. رویټرز لیکلي، چې د کرېکټ نړۍوالې شورا تر اوسه د دې اژانس هغه پوښتنو ته ځواب نه دی ورکړی، چې ایا د بنګلهدېش غوښتنه به ومنل شي او که نه او دا چې سیالۍ به سریلانکا ته ولېږدول شي.
په وروستیو اوونیو کې د نوي ډیلي او ډاکا ترمنځ د تاوتریخوالي کچه لوړه شوې ده. تېره میاشت سلګونو کسانو د نوي ډیلي ښار کې د بنګلهدېش د عالي کمېسیون مخې ته مظاهره وکړه. دا اعتراض هغه مهال وشو، چې د بنګلهدېش د میمنسینګ ولسوالۍ کې یو هندو کارګر د اسلام د پیغمبر د سپکاوي په تور وهل شوی او سوځول شوی و.
افغان کرېکټ ستوري راشد خان په ۲۰۱۸ کال کې د ۹۶ ویکټو په اخیستو سره د شل اوریزه کرېکټ سیالیو په تاریخ کې ریکارډ جوړ کړی و.
دغه ریکارډ اوه کاله پر خپل ځای پاتي و، چې اوس جېسون هولډر په روان کال کې د ۹۷ ویکټو په اخیستو دا ریکارډ په خپل نوم کړ.
د وېسډن کرېکټ د راپور لهمخې، راشد خان دا ریکارډ په ۶۱ لوبو کې د ۱۵.۴۶ په زړه پورې اوسط سره ترلاسه کړی و. له همدې امله، نوموړی د شل اوریز کرېکټ په تاریخ کې له تر ټولو اغېزناکو توپاچوونکو څخه شمېرل شوی دی.
د چټکو توپ اچونکو له ډلې یوازي دوه لوبغاړي توانېدلي، چې په یوه کال کې له ۸۰ څخه زیاتې ویکټې واخلي.
د ویسټ انډیز بل لوبغاړی ډواین براوو په ۲۰۱۶ کال کې په ۷۱ لوبو کې د ۸۷ ویکټو په اخیستو او د ۲۴.۴۷ اوسط سره دې مقام ته رسېدلی و. په وروستیو کلونو کې د افغانستان د کرېکټ د ملي لوبډلي ستوری نوینالحق هم په ۲۰۲۴ کال کې د ۷۸ ویکټو په اخیستو خپل نوم په نړۍواله کچه مطرح کړی دی.
د ۲۰۲۵ کال په سیالیو کې د جېسون هولډر د لوبې له مهمو ځانګړنو څخه یوه دا وه، چې هغه د توپ وهلو په برخه کې هم ښه وځلېد. نوموړي په همدې کال کې ۸۴۶ منډې جوړې کړي او د خپلې لوبډلې په بریاوو کې یې مهم رول لوبولی دی.
باید وویل شي، چې راشد خان په ۲۰۱۷ او ۲۰۲۲ کلونو کې هم په ترتیب سره د ۸۰ او ۸۱ ویکټو په اخیستو سره د کال تر ټولو ډېرې ویکټې ترلاسه کړې وې؛ خو د هغه تاریخي ریکارډ د ۲۰۱۸ کال پورې تړاو لري. له راشد خان څخه مخکې دا ریکارډ د ډواین براوو په واک کې و، چې ۸۷ ویکټې یې اخیستې وې.
د افغانستان بل نوموتی توپ اچوونکی نور احمد لکڼوال هم یو ځل په ۲۰۲۵ کال کې د ۸۵ ویکټو په اخیستو سره د کال تر ټولو لوړ شمېر ثبت کړی و، خو ونه توانېد، چې نړۍوال ریکارډ مات کړي.
د افغانستان د غرنیو سیمو او د هېواد په ګڼو ولایتونو کې د غره ختلو د مناسبو شرایطو شتهوالي ته په پام، په وروستیو کلونو کې د ورزشکارانو او مینهوالو لهخوا د غره ختلو له ورزش څخه په پراخه کچه هرکلی شوی دی. په دې برخه کې په ډېرو ولایتونو کې د غره ختلو لوبډلې جوړې شوې، چې منظم ورزشي فعالیتونه څاري.
په افغانستان کې مسلکي روزنه او د غره ختلو تجهیزاتو ته لاسرسی هم ښه شوی او په دې برخه کې لوبغاړي د پخوا پرتله په خوندي حالت کې دي، چې دا د غره ختلو ورزش په ودې او پراختیا کې مهم رول لوبوي.
