د طالبانو تر واک لاندې د برېښنا شرکت خبر ورکړی، چې د کابل ولايت د سروبي ولسوالۍ په نغلو سيمه کې د ۱۸مېلیونه ډالرو په ارزښت یې د لمريزې برېښنا تر ټولو لويه پروژه ګټې اخيستنې ته وسپارله.
د یاد شرکت په وینا؛ دغه پروژه د ۲۲.۷۵ مېګاواټه لمريزې برېښنا د توليد وړتيا لري، چې په فعالېدو سره به يې له ۲۳زرو زډېرو کورنيو ته برېښنا برابره شي.
ورته مهال د طالبانو د رياست الوزرا اداري مرستيال عبدالسلام حنفي وایي، دا مهال د کورنو لپاره له ۵زره زياتو او صنعتي برخې ته بيا له ۱۰زره مېګاواټو د زياتې برېښنا توليدي سرچينو ته اړتيا ده. د هغه په وینا؛ د نغلو ۲۲.۷۵ مېګاواټه پروژې سره به له ۲۳زره زياتې کورنۍ له برېښنا برخمنې شي.
هغه زیاته کړې:«له بده مرغه افغانستان کې په پوره اندازه د اړتیا وړ برېښنا توليد او واردات نهلرو؛ خو د برېښنا شرکت په هڅو اوس له ۱۲۰۰ مېګاواټو د زياتې برېښنا توليدي پروژې د پلي کېدو په حال کې دي.»
د طالبانو تر واک لاندې د برېښنا شرکت اجرايوي مشر عبدالباري عمر د یادې پروژې د پرانیستې په مراسمو کې ویلي، افغانستان کې د ۴۷ کلونو ناخوالې را پاتې دي او د ناخوالو ځپلي هېواد ابادول اسانه چاره نهده.
د ښاغلي عمر په وینا؛ دا مهال د ډبرو سکرو، بادي او لمريزې برېښنا توليد ګڼې پروژې تر کار لاندې دي. هغه وایي:« هېواد کې ورځ تر بلې صنعت مخ په پراختیا دی، داسې فابريکې هم اوس فعاليت لري، چې ۴۰ مېګاواټه برېښنا ته اړتيا لري، چې دا د دوو ولايتونو په تناسب برېښنا ده؛ د نغلو لمرېزه دستګاه به تر يوه بريده دې ستونزې ته رسېدنه وکړي».
طالبانو تردې وړاندې هم د افغانستان په ځینو نورو ولایتونو کې د برېښنا د تولید پروژو د چارو د پیل خبر ورکړی و؛ خو لا هم د کابل په ګډون په ګڼو ولایتونو کې د برېښنا د کمښت له امله خلک له ستونزو سره مخ دي.
د یادونې وړ ده، چې د افغانستان تر نیمايي زیاته برېښنا وارداتي ده او ډېری یې هم له تاجکستان، ازبکستان، ترکمنستان او ایران نه واردېږي.
