هرات ولایت کې طالب چارواکي وایي، د ۱۴۰۴ لمریز کال په لومړیو ۹ میاشتو کې له دغه ولایته د ۲۴ مېلیونه او ۲۶۸زره امریکایي ډالرو په ارزښت څه باندې ۲۲زره مټریک ټنه طبي نباتات د نړۍ بېلابېلو هېوادونو ته صادر شوي دي.
د ورکړل شویو معلوماتو له مخې؛ دغه صادرات د تېر کال د همدې مودې پرتله درې برابره زیاتوالی ښيي. صادر شويو طبي نباتاتو کې د زرشک لرګي، توره زیره، شنه زیره، شیرینبیان، ادرک، دارچین، اویشن او یو شمېر نور طبي بوټي شامل دي چې د هرات له لارې نړۍوالو بازارونو ته رسېدلي دي.
هرات کې د طالبانو ځایي اداره د کرنې او صادراتو سکتور پر ارزښت د ټینګار ترڅنګ ډاډ ورکوي، چې د طبي نباتاتو د کروندګرو، سوداګرو او صادرونکو د ملاتړ لپاره لازمې اسانتیاوې برابرې شوې دي. د طالب چارواکو په وینا؛ د صادراتو د بهیر د ښهوالي، د کرنیزو محصولاتو د بازارموندنې او نړۍوالو بازارونو ته د لاسرسي د پراخولو په برخه کې عملي ګامونه هم اخیستل شوي دي.
د طالبانو ولایتي چارواکي وایي، چې د طبي نباتاتو د صادراتو زیاتوالی کولای شي د هرات د سیمهییز اقتصاد په وده، د کاري فرصتونو په رامنځته کولو او د کروندګرو د عوایدو په لوړولو کې مهم رول ولوبوي.
