طالبانو په تېرو شپږو ورځو کې ۲۷ کسان په عام محضر کې په دُرو وهلي دي
د طالبانو ستره محکمه وایي چې په تېرو شپږو ورځو کې یې د هېواد په بېلابېلو ښارونو کې ۲۷ کسانو ته د بېلابېلو جرمونو په تور بدني سزاوې ورکړې دي.
د طالبانو ستره محکمه وایي چې په تېرو شپږو ورځو کې یې د هېواد په بېلابېلو ښارونو کې ۲۷ کسانو ته د بېلابېلو جرمونو په تور بدني سزاوې ورکړې دي.
د طالبانو له سترې محکمې څخه په خپره شوې خبرپاڼه کې راغلي چې ډېری دغه سزاوې په عام محضر کې عملي شوې دي.
د معلوماتو له مخې، دا سزاوې د کابل، هرات، بلخ، پکتیا، کونړ، میدان وردک، خوست، غزني، پروان، پکتیکا او بدخشان په ولایتونو کې پلي شوې دي.
په خبرپاڼه کې ویل شوي چې تورن کسان د غلا، اخلاقي جرمونو او نورو قضیو په تړاو د درو وهلو له سزا سره مخ شوي دي.
د طالبانو سترې محکمې په یوه جلا خبرپاڼه کې ویلي چې د بدخشان په ولایت کې نن یو کس د زنا په تور پر ۱۲میاشتو بند او ۳۹درو وهلو محکوم شوی او دا سزا پرې عملي شوې ده.
طالبانو واک ته له بیا راستنېدو وروسته په عام محضر کې د بدني مجازاتو او اعدامونو تطبیق بیا پیل کړی دی. دغه اقدامات د نړیوالې ټولنې او د بشري حقونو د بنسټونو له پراخو غبرګونونو سره مخ دي.
نړیوالو بنسټونو او د بشري حقونو مدافعینو په وار وار له طالبانو غوښتي چې د تورنو کسانو پر وړاندې د بدني سزاوو تطبیق ودروي، خو طالبان وایي چې دا مجازات د دوی له لوري د «اسلامي شریعت» پر بنسټ عملي کېږي او پر خپله تګلاره ټینګار کوي.
