د متقي او سعدوف ټلیفوني اړیکه؛ ډیر ژر به د ټرانس افغان پروژې د امکان ارزونې مطالعات پیل شي
د طالبانو بهرنیو چارو وزیر امیرخان متقي د ازبکستان د بهرنیو چارو وزیر بختیار سعیدوف سره ټیلیفوني خبرې اترې کړي دي. سعیدوف ویلی، چې د دواړو هیوادونو ترمنځ په سوداګریزو اړیکو کې د پام وړ پرمختګ شاهدان یو او ډیر ژر به د ټرانس افغان پروژې د امکان ارزونې د مطالعاتو کار پیل شي.
د طالبانو د بهرنیو چارو وزارت نن شنبه، د کب ۲مه پر اېکس خواله رسنۍ کې د یوې اعلامیې په خپرولو سره زیاته کړې، چې امیرخان متقي د خبرو پرمهال ویلي، چې د افغانستان او ازبکستان تر منځ د دوه اړخېزو اړیکو او سوداګرۍ په برخه کې ښه فرصتونه برابر شوي دي.
د اعلامیې په پای کې راغلي، چې دواړو خواوو د سیمې پر وضعیت، او د دواړو هیوادونو ترمنځ د راتلونکو پلانونو او په ځانګړې توګه د افغانستان او منځنۍ اسیا پر اړیکو تفصیلي بحثونه ترسره کړل.
