امریکا له خپلو وګړو غوښتي چې سملاسي له افغانستان څخه ووځي

هغه ویلي چې «فتنه خوارج» هڅه کړې وه په ایبټ‌اباد، صوابۍ او نوښار کې واړه ډرونونه والوځوي، خو د ده په وینا د ډرون ضد سیسټمونو ټولې الوتکې نسکورې کړې دي. پاکستان تل پاکستاني طالبانو ته د «فتنه خوارج» نوم کاروي.

د اطلاعاتو وزیر زیاته کړې چې دغو پېښو هېڅ ډول ځاني زیان نه دی اړولی، خو په خبره یې دا پرمختګونه یو ځل بیا په پاکستان کې د ترهګرۍ او د طالبانو ترمنځ مستقیم تړاو څرګندوي.

بلخوا د طالبانو د دفاع وزارت په یوې خبرپاڼه کې ادعا کړې چې په اسلام‌اباد او ځینو نورو ښارونوکې یې د پاکستان پوځي مرکزونه په هوايي بریدونو هدف ګرځولي دي.

راپورونه ښيي، چې د تاوتریخوالي له زیاتېدو سره سم پاکستاني پولیسو په کراچۍ او راولپنډۍ ښارونو کې ګڼ افغانان نیولي دي. دا په داسې حال کې ده، چې شاوخوا شپږ میاشتې وړاندې پاکستان د افغانانو د ویزو د تمدید لړۍ درولې او زرګونه کډوال اوس له ناروښانه وضعیت سره مخ دي.
د دغه کډوالو په منځ کې د بشري حقونو فعالان، خبریالان او هغه کسان چې امریکا او اروپايي هېوادونو ته د پناه غوښتنې دوسیو د ارزونې په تمه دي؛ تر نورو ډېر زیان منونکي بلل کېږي. له دې ډلې یو افغان وایي، د امنیتي ګواښونو له امله افغانستان ته بېرته نه‌شي ستنېدای؛ خو په پاکستان کې هم د نیولو، جبري اېستلو او د امنیتي فشارونو له ګواښ سره مخامخ دي.
هغه د نوم نه ښودلو په شرط وایي، د وضعیت تر کړکېچنېدو وروسته ځینې افغان کورنۍ بېګاه شپه ناوخته د نیولو او د جبري اېستنې له وېرې له پنجاب څخه پېښور ته کډه شوې دي.

همداراز د تورخم په دروازه کې یوشمېر هغه کډوال چې افغانستان ته د ستنېدو په تمه وو؛ د سختې نښتې له امله لنډي کوتل او د حمزه بابا مزار شاوخوا سیمو ته لېږدول شوي دي.
بلخوا، په ننګرهار کې د طالبانو د اطلاعاتو او کلتور ریاست د اطلاعاتو امر قریشي بدلون ادعا کړې، چې پاکستاني ځواکونو په تورخم کې د کډوالو عمري پنډغالی په نښه کړی دی. د هغه په وینا؛ پر عمري پنډغالي د برید له امله یوشمېر کډوال ټپیان شوي هم دي.

دا په داسې حال کې ده، چې تر ناکراره شپې وروسته په پاکستان کې مېشتو کډوالو ورځ په پنجاب، اسلام‌اباد او کراچۍ ښارونو کې د پولیسو له پراخو عملیاتو سره پیل کړه.

ډیورنډ کرښې ته څېرمه پر پاکستاني پوځیانو د طالبانو د غچ اخیستونکو بریدونو له پای ته رسېدو وروسته، د پاکستان د کورنیو چارو وزیر طالبانو ته خبرداری ورکړ چې پر پاکستان بریدونه لویه تېروتنه وه او دغه ډله به له سختو پایلو سره مخ شي.

نوموړي اعا کړې ده، چې د پاکستان پوځ د طالبانو بریدونو ته سخت ځواب ورکړی دی.

نوموړي ویلي: «امنیتي ځواکونه د هر ډول بریدګر تحرک د شنډولو لپاره بشپړ چمتووالی لري».

د طالبانو د دفاع وزارت په خبرپاڼه کې زیاته شوې ده چې په ننګرهار، کونړ، خوست، پکتیا او پکتیکا ولایتونو کې د دغو بریدونو پر مهال له څلورو پاکستاني پوستو څخه عسکر هم تښتېدلي دي.

همدا راز ویل شوي چې طالبانو یو شمېر پاکستاني عسکر تر نیول کېدو وروسته له ځان سره د افغانستان خاورې ته رالېږدولي دي. طالبانو‌ په دې جګړه کې د خپلو ۸عسکرو وژل کېدل هم تایید کړي دي.

د طالبانو دفاع وزارت وایي، د ننګرهار په تورخم ښارګوټي کې بیا پاکستاني عسکرو پر بېرته راستنو شویو کډوالو باندې ډزې کړي چې له کبله یې ۱۳ کسان ټپیان شوي چې ښځې او ماشومان هم پکې شامل دي.

هم‌مهاله پاکستان هم ادعا کړې چې دغه جګړه کې یې ۴۰ طالبان وژلي؛ خو لا تر اوسه پورې هېڅ خپلواکې سرچینې د دواړو خواوو شمېرې نه دي تایید کړي.

دغه پښتون سیاستوال پر خپلې اېکس‌پاڼې لیکلي:« د سختدریځۍ تخمونه وکرل شول، کرکې ته لمن ووهل شوه او یو بشپړ نسل په ذهني ډول د جګړې او تشدد غېږې ته وسپارل شو. که خدای مګړه دا اور یوځل بیا بل شو، نو بیا به د دا اور هېڅ پوله، هېڅ قومیت او هېڅ ریاست ارام نه کړي».

نوموړي ویلي، چې پښتانه په ټولیزه توګه سوله خوښوونکي دي او روانه جګړه د افغانستان او پاکستان د ولسونو نه، بلکې د نړۍوالو قدرتونو جګړه ده.

نوموړي زیاته کړې:«پوښتنه دا ده، چې ایا په افغانستان کې واکمن حکومت په رښتیا د ولس د ارادې استازی دی؟ ایا په پاکستان او ځانګړې ډول پښتونخوا کې جوړ شوي حکومتونه په حقیقت سره د ولس په رایه رامنځته شوي دي؟ حقیقت دا دی چې د دې حکومتونو په جوړولو کې د ولسي ارادې په پرتله د نورو قوتونو رول خورا زیات دی».

اېمل ولي خان پر دواړو لوریو غږ کړی، چې له جګړې لاس واخلي او خپلې ستونزې دې د خبرو اترو له لارې حل کړي.