د پاکستان د اطلاعاتو وزیر: په څو ښارونو کې د بېپیلوټه الوتکو بریدونه شوي

د پاکستان د اطلاعاتو وزیر عطاالله تارړ، منلې چې د دغه هېواد په څو ښارونو کې د بېپیلوټه الوتکو بریدونه شوي، خو ټینګار یې کړی چې دا بریدونه د افغان طالبانو نه، بلکې د تحریک طالبان پاکستان له لوري ترسره شوي دي.
هغه ویلي چې «فتنه خوارج» هڅه کړې وه په ایبټاباد، صوابۍ او نوښار کې واړه ډرونونه والوځوي، خو د ده په وینا د ډرون ضد سیسټمونو ټولې الوتکې نسکورې کړې دي. پاکستان تل پاکستاني طالبانو ته د «فتنه خوارج» نوم کاروي.
د اطلاعاتو وزیر زیاته کړې چې دغو پېښو هېڅ ډول ځاني زیان نه دی اړولی، خو په خبره یې دا پرمختګونه یو ځل بیا په پاکستان کې د ترهګرۍ او د طالبانو ترمنځ مستقیم تړاو څرګندوي.
بلخوا د طالبانو د دفاع وزارت په یوې خبرپاڼه کې ادعا کړې چې په اسلاماباد او ځینو نورو ښارونوکې یې د پاکستان پوځي مرکزونه په هوايي بریدونو هدف ګرځولي دي.
