طالبان وايي له پاکستان سره خبرو اترو ته چمتو دي

هغه وویل، چې له پوځي پلوه د دواړو لوریو وړتیاوې «هېڅ د پرتله کېدو وړ نه دي» او څو ترسره شوي بریدونه د جګړې تله نه‌شي بدلولای.

نوموړي د جمعې په ورځ پر خپلې فېسبوک‌پاڼې لیکلي، چې طالبان کولای شي پاکستان یوې ستړې کوونکې او اوږدمهالې چریکي جګړې ته راکاږي؛ داسې جګړه چې افغانستان به په‌کې د جګړې ډګر وي او په پای کې به خېبرپښتونخوا او بلوچستان هم ورسره ښکېل شي. خو هغه ټینګار وکړ، چې «طالب د افغانستان د دفاع توان نه‌لري».

وحید عمر زیاته کړه، چې پخوا حالت بل ډول و. هغه مهال چې طالبانو د پخواني حکومت پر ضد جګړه کوله، پاکستان د هغوی تر شا ولاړ و، روزنه او وسلې یې ورکولې، ټپیان یې تداوي کول او تبلیغات یې ورته کول.

ده همدارنګه لیکلي، چې روسیه، ایران او چین هم د خپلو موخو لهمخې د ناټو پر ضد د طالبانو ملاتړ کاوه او له همدې امله هغه جګړه د طالبانو په ګټه پای ته ورسېده. د هغه په وینا، پاکستان د طالبانو «نعمت» دی او طالبان پاکستان ښه پېژني.

نوموړي په دوام کې ولیکل، چې په اوسني وضعیت کې «سیمه او امریکا د پاکستان تر څنګ ولاړه ده» او طالبان یوازې پاتې شوي دي.

د وحید عمر په وینا، پاکستان له امریکا سره ژمنه کړې چې په افغانستان کې پاتې شوي پوځي تجهیزات له‌منځه یوسي او ښایي د وروستیو بمباریو په اړه یې هم راپور ورکړی وي. هغه ټینګار وکړ، چې په دې برخه کې هېڅ شک نه‌لري چې امریکا د پاکستان تر شا ولاړه ده.

وحید عمر وویل، چې افغانستان لا هم تر یوه بریده اباد دی او اندېښنه یې څرګنده کړه چې د طالبانو او پاکستان ترمنځ جګړه به هېواد وران کړي.

هغه زیاته کړه، چې دا جګړه د افغانستان لپاره هېڅ ګټه نه‌لري او کېدای شي له څو ورځو وروسته د سعودي عربستان او قطر په منځګړیتوب پای ته ورسېږي، خو په دې منځ کې به افغانستان زیان وویني.

د هغه په خبره، په دې معادله کې ولس ته ځای نه دی ورکړل شوی او د خلکو رول یوازې دومره دی چې د ملي احساساتو په پارولو سره د طالبانو ملا وتړي او که له پاکستان سره بیا کومه هوکړه وشي، طالبان به بېرته د ولس پر لور راوګرځي.

ریچارډ لېنډسي د جمعې په ورځ پر خپلې اېکس‌پاڼې لیکلي، چې د برېتانیا د سرې میاشتې، نړۍوال فدراسیون او د افغان ښځو د ملاتړ ټولنې له غړو سره یې په لیدنه کې په افغانستان کې د بشري ناورین په اړه اغېزناکې او جدي خبرې کړې دي.

نوموړي د افغان مرستندویه کارکوونکو زړورتیا د ستاینې وړ بللې ده.

پر همدغه مهال ریچارډ لېنډسي زیاته کړې: «برېتانیا به د افغان ښځو او نجونو او هغو کسانو ملاتړ ته دوام ورکړي چې د هغوی لپاره نه ستړي کېدونکي هڅې کوي».

دا په داسې حال کې ده، چې برېتانیا یو له هغو هېوادونو دی چې په تېرو څو کلونو کې یې د افغان ښځو د حقونو او د هغوی د بشري وضعیت په اړه فعال ډیپلوماټیک او مالي رول لوبولی دی

د سرچینو له‌خوا افغانستان انټرنشنل ـ پښتو ته په استول شوې ویډیو کې د ډزو غږونه اوریدل کېږي او سرچینو ویلي، چې یادې ډزې د طالبانو له‌خوا پر الوتکو ترسره کېږي.

سرچینو ویلي، چې طالبانو د لویې ویالې په سیمه کې د تېر جمهوري نظام د ۰۳ قطعي په مرکز (د لوی ملا صاحب سرای) او په ښوراندام کې د الوتکو د ګرځېدو د مخنیوي په موخه دهشکې ځای پر ځای کړې دي او اوس هم له همدې دوو ځایونو څخه پر الوتکو ډزې کېږي.

سرچینو ویلي، تر اوسه د الوتکو له‌خوا کوم برید نه دی شوی.

خوشحال سعادت د طالبانو د دفاع وزارت له‌خوا د بې‌پیلوټه الوتکو د بریدونو تازه خپره شوې ویډیو یو ځل بیا پر خپلې اېکس‌پاڼې خپره کړې او زیاته کړې یې ده: «موخه د دوښمن له‌منځه وړل دي، که هغه د جېټ الوتکو له لارې وي او که د پرمختللو ډرونونو په وسیله».

نوموړي همدارنګه ویلي، چې د پاکستان د جېټ الوتکو د عملیاتو لګښت د افغانستان د ډرونونو له لګښتونو سره د پرتلې وړ نه دی.

سعادت زیاته کړې: «د یوه جېټ د بم بیه شاوخوا ۸۰ زره الره ده، د افغانستان د ډرون مهماتو ارزښت کېدای شي تر زر ډالرو هم کم وي. پاکستان د اوږدمهاله جګړې توان نه‌لري».

نوموړي دا څرګندونې پر داسې مهال کړي، چې د طالبانو دفاع وزارت تازه د خپلو بې‌پېلوټه الوتکو د بریدونو یوه ویډیو خپره کړې او ادعا یې کړې، چې اسلام‌اباد کې یې د پاکستان پوځي تاسیسات په نښه کړې دي. طالبانو ویلي، دغه عملیات د «رحمان لښکر» تر نوم لاندې ترسره شوي دي.

هغه د ۱۹۸۰مې لسيزې پر مهال د شوروي اتحاد پر ضد د افغانستان جګړې ته په اشارې سره وويل، چې پاکستان «په پوره اخلاص او ژمنتيا» د افغان مجاهدينو تر څنګ ولاړ و. ده زياته کړه، چې پاکستان د ميليونونو افغان کډوالو کوربه‌توب وکړ او زيات شمېر يې تر اوسه هم په پاکستان کې مېشت دي او خپل ژوند له همدې هېواده پر مخ وړي.

د هغه په خبره، د سراج‌الدین حقاني د کورنۍ په ګډون د مجاهدينو مشران او د هغوی کورنۍ هم کلونه کلونه په پاکستان کې اوسېدلي دي او دواړو لوریو د يوه ګډ هدف لپاره چې د ده په وينا د امريکا له‌خوا ټاکل شوی و، د شوروي پر ضد جګړه کوله.

د پاکستان د دفاع وزير وروسته د ۲۰۰۱م کال د سپټمبر د يوولسمې نېټې بريدونو ته اشاره وکړه او ويې ويل، چې اسلام‌اباد په هغه پېر کې د ناټو لپاره د اسانتيا برابرونکي په توګه رول لوباوه، خو په همدې وخت کې د امريکا له لوري پرې دا تور پورې کېده چې ګواکې د «حقاني شبکې» ملاتړ کوي. هغه له سراج‌الدین حقاني پوښتلي چې ايا دا تورونه سم وو که ناسم او په دې اړه يې د روښانتيا غوښتنه وکړه.

اصف همدارنګه پر هغه څه نیوکه وکړه، چې ده ورته له ۱۹۷۹م کال څخه د سپټمبر د یوولسمې تر پېښې وروسته پورې «دوه مخې لوبې» ویلې وې. ده وويل، چې امريکا په بېلابېلو پړاوونو کې دواړه لوري يوازې پرېښي دي. د ده په خبره، پاکستان هڅه کوله چې د افغان ډلو تر منځ خپلمنځي شخړې هوارې کړي او ان تر دې چې په کعبه کې يې د منځګړيتوب هڅې هم کړې دي. هغه ادعا وکړه، چې پاکستان د افغانانو درېيو نسلونو د مشرانو او د هغوی د کورنيو کوربه پاتې شوی دی.

د پيغام په بله برخه کې، نوموړي افغان طالبان تورن کړل چې «د پاکستان دوښمنانو» ته يې پناه ورکړې او اجازه ورکوي، چې د افغانستان له خاورې د پاکستان پر ضد کار واخيستل شي. هغه وويل، کابل ته په خپل سفر کې يې دا موضوع مخامخ سراج‌الدین حقاني ته ياده کړې او غوښتنه يې کړې، چې د پاکستان ضد ډلو ملاتړ پای ته ورسول شي. د ده په وينا، ان د مالي مرستې وړانديز هم شوی، خو «هېڅ ډاډ» نه دی تر لاسه شوی چې طالبان به د ټي‌ټي‌پي خلاف اقدامات وکړي او که نه.

د پاکستان د دفاع وزير د «حقاني» نوم د درناوي وړ بللی او د هغه د ديني مخينې په يادولو سره یې ټينګار وکړ، چې د دغه نوم حرمت بايد وساتل شي. هغه وويل، چې پاکستان د دوښمنۍ غوښتونکی نه دی او هيله لري چې د افغانستان خاوره به د پاکستان پر ضد نه کارول کېږي.