په امنیت شورا کې د امریکا استازی: د ایران «رژيم» سیمه نا ارامه او نړۍ بې‌ثباته کړې وه

نوموړي ویلي، چې د امنیت شورا یاده بېړنۍ غونډه د فرانسې د ولسمشر په غوښتنه جوړه شوې ده او زیاته یې کړه: «سیمه ثبات ته اړتیا لري. تاوتریخوالی باید کم شي او په سیمه کې د اوږدمهاله امنیت لپاره شرط د نړۍوالو قوانینو درناوی دی».

نوموړي د ایران له‌خوا پر څو عربي هېوادونو بریدونه وغندل او زیاته یې کړه، فرانسه چمتو ده چې د یادو هېوادونو د ساتنې په برخه کې لازمه همکاري وکړي.

دا په داسې حال کې ده، چې پر ایران بریدونه د یاد هېواد د اټومي پروګرام د دوامداره څار په شرایطو کې ترسره کېږي.

ګوترېش په یاده غونډه کې ویلي، چې د امریکا او اسراییل په ګډو بریدونو کې د ایران شاوخوا ۲۰ ښارونه په نښه شوي دي.

نوموړي د ایران د ځینو مشرانو د وژل کېدو راپورونو ته په اشاره ویلي، چې تر اوسه د یادو ایراني چارواکو وژل کېدو په خپلواک ډول نه‌شي تاییدولی.

نوموړي خبرداری ورکړی: «په سیمه کې د پوځي اقدام پیل د داسې پېښو د لړۍ خطر له ځان سره لري، چې کنټرول یې ناشونی دی.»

همدارنګه نوموړي زیاته کړې: «زه د تاوتریخوالي د کمولو او د دوښمنیو سمدستي بندولو غوښتنه کوم او زه له ټولو اړخونو څخه غوښتنه کوم چې سملاسي د خبرو اترو مېز ته راستانه شي».

ګوترېش پر ایران د امریکا او اسراییل ګډ بریدونه او د ایران د متقابل بریدونو په اړه ژوره اندېښنه ښودلې ده.

نوموړې زیاته کړې: «دا ډول اقدامات د داسې پېښو د لړۍ د پیل خطر لري چې په نړۍ کې د تر ټولو بې‌ثباته سیمې «منځني ختیځ» د وضعیت کنټرول ناشونی کوي».

نوموړي د ټولو لوریو ترمنځ د شخړې او ستونزو د هواری لپاره پر مذاکراتو ټینګار کړی دی.

ملالې یوسفزۍ په سوېلي ایران کې د نجونو پر یوه ښوونځي شوی برید چې له امله یې په‌کې یو شمېر نجونو زده‌کوونکو ته مرګ‌ژوبله اوښتې خپله ژوره خواشیني څرګنده کړې او ویلي یې دي، چې د ولسي وګړو او په ځانګړې توګه د ماشومانو وژل، د منلو وړ نه‌دي او «زه یې په کلکه غندم».

هغې زیاته کړې: «زما زړه له هغو ماشومانو، کورنیو او ټولنو سره دی چې په ټوله سیمه کې د تاوتریخوالي له امله ځپل شوي دي. زه د تاوتریخوالي او د ښوونځیو او ملکي وګړو د په نښه کولو پر وړاندې په کلکه ولاړه یم».

هغې په سیمه کې د تاوتریخوالي د پای ته رسېدو غوښتنه کړې او د ولسي وګړو او همداراز د ښوونځيو د امنیت پر ساتنې یې ټينګار کړی دی.

د راپورونو له‌مخې، د امریکا او اسراییل د ګډو بریدونو په ترڅ کې د ایران د مذهبي مشر علي خامنه‌يي له وژل کېدو وروسته د سپاه پاسداران پاتې قوماندانان هڅه کوي چې په راتلونکو څو ساعتونو کې نوی مشر وټاکي.

د راپورونو له‌مخې، د خامنه‌يي له وژل کېدو وروسته د سپاه پاسداران په امنیتي جوړښت کې سرګرداني زیاته شوې ده.

ایران انټرنشنل د خپلو سرچینو له قوله راپور ورکړی، چې د امریکا او اسراییل د بریدونو د دوام له وېرې ځیني قوماندانان او ټېټ رتبه پوځیان نظامي اډو او مرکزونو ته له ورتګ څخه ډډه کوي.