په ایران له بریدونو وروسته؛ د ملګرو ملتونو د امنیت شورا بېړنۍ غونډه پیل شوه

ګوترېش پر ایران د امریکا او اسراییل ګډ بریدونه او د ایران د متقابل بریدونو په اړه ژوره اندېښنه ښودلې ده.

نوموړې زیاته کړې: «دا ډول اقدامات د داسې پېښو د لړۍ د پیل خطر لري چې په نړۍ کې د تر ټولو بې‌ثباته سیمې «منځني ختیځ» د وضعیت کنټرول ناشونی کوي».

نوموړي د ټولو لوریو ترمنځ د شخړې او ستونزو د هواری لپاره پر مذاکراتو ټینګار کړی دی.

ملالې یوسفزۍ په سوېلي ایران کې د نجونو پر یوه ښوونځي شوی برید چې له امله یې په‌کې یو شمېر نجونو زده‌کوونکو ته مرګ‌ژوبله اوښتې خپله ژوره خواشیني څرګنده کړې او ویلي یې دي، چې د ولسي وګړو او په ځانګړې توګه د ماشومانو وژل، د منلو وړ نه‌دي او «زه یې په کلکه غندم».

هغې زیاته کړې: «زما زړه له هغو ماشومانو، کورنیو او ټولنو سره دی چې په ټوله سیمه کې د تاوتریخوالي له امله ځپل شوي دي. زه د تاوتریخوالي او د ښوونځیو او ملکي وګړو د په نښه کولو پر وړاندې په کلکه ولاړه یم».

هغې په سیمه کې د تاوتریخوالي د پای ته رسېدو غوښتنه کړې او د ولسي وګړو او همداراز د ښوونځيو د امنیت پر ساتنې یې ټينګار کړی دی.

د راپورونو له‌مخې، د امریکا او اسراییل د ګډو بریدونو په ترڅ کې د ایران د مذهبي مشر علي خامنه‌يي له وژل کېدو وروسته د سپاه پاسداران پاتې قوماندانان هڅه کوي چې په راتلونکو څو ساعتونو کې نوی مشر وټاکي.

د راپورونو له‌مخې، د خامنه‌يي له وژل کېدو وروسته د سپاه پاسداران په امنیتي جوړښت کې سرګرداني زیاته شوې ده.

ایران انټرنشنل د خپلو سرچینو له قوله راپور ورکړی، چې د امریکا او اسراییل د بریدونو د دوام له وېرې ځیني قوماندانان او ټېټ رتبه پوځیان نظامي اډو او مرکزونو ته له ورتګ څخه ډډه کوي.

اسراییلي پوځ همداراز د ایران د دفاع وزیر عزیزنصیر زاده، د سپاه پاسداران د قومندان محمد پاکپور، د خامنه‌يي سلاکار علي شمخاني، د خامنه‌يي د نظامي دفتر رييس محمد شیرازي، د خاتم الانبیاء قرارګاه د استخباراتو د سازمان رييس صالح اسدي، د دفاعي څېړنو او نوښتونو سازمان (سپند) پخوانی عمومي مدیر رضا مظفری‌نیا او د «سپند» سازمان اوسنی رييس حسین جبل عاملیان له وژل کېدو هم خبر ورکړی دی.

د اسراییل پوځ ویلي، چې د شنبې په سهار د اسراییل د هوايي ځواک په سلګونو جنګي الوتکو په ټول ایران کې په سلګونو نظامي موخې په نښه کړې دي.

پوځ زیاته کړه، په ټول تهران کې یې داسې څو ځایونه هم په نښه کړي، چې د ایران د امنیتي مشرتابه لوړپوړي غړي په‌کې پر اسراییل د بریدونو د پلانولو او د کورنیو اعتراضونو پر مهال د ایران د خلکو د ځپلو لپاره راټول شوي وو.

د افغانستان پخوانی ولسمشر حامد کرزي پر اېکس په یوه اعلامیه کې د ایران خلاف د امریکا او اسراییل نظامي ځواک کارول د مسایلو د سوله‌ییز حل په برخه کې له نړۍوالو تعهداتو سره په ټکر کې بللي دي.

کرزي د سیمې نورو هېوادونو ته د جګړې پر غځېدو اندېښنه ښودلې او ویلي یې دي، چې له دې امله په سعودي عربستان، متحده عربي اماراتو، قطر، بحرین، کویت او اردن کې د خلکو پر متاثره کېدو ژوره اندېښنه څرګندوي.

هغه ټینګار کړی، چې د سیمې د ثبات او امنیت ساتنې لپاره اړینه ده چې ټول بریدونه ودرېږي او ښکېل اړخونه د ستونزو د حل لپاره د خبرو مېز ته ستانه شي.

حامد کرزي د ملکي وګړو او ملکي سیمو د خوندیتوب په برخه کې نړۍوالو قواعدو ته پر درناوي ټینګار کړی او هیله یې څرګنده کړې، چې د ایران خلک، په دغه هېواد کې افغان کډوال او د سیمې د نورو هېوادونو خلک له بریدونو او زیانونو خوندي پاتې شي.