د افغانستان پخواني ولسمشر حامد کرزي پر ایران د امریکا او اسراییل بریدونه د مسایلو د سولهییز حل په تړاو د دولتونو له نړۍوالو ژمنو سره په ټکر کې بللي. کرزي هیله ښودلې، چې د ایران خلک، افغان کډوال او د سیمې د نورو هېوادونو وګړي له بریدونو خوندي واوسي.
د افغانستان پخوانی ولسمشر حامد کرزي پر اېکس په یوه اعلامیه کې د ایران خلاف د امریکا او اسراییل نظامي ځواک کارول د مسایلو د سولهییز حل په برخه کې له نړۍوالو تعهداتو سره په ټکر کې بللي دي.
کرزي د سیمې نورو هېوادونو ته د جګړې پر غځېدو اندېښنه ښودلې او ویلي یې دي، چې له دې امله په سعودي عربستان، متحده عربي اماراتو، قطر، بحرین، کویت او اردن کې د خلکو پر متاثره کېدو ژوره اندېښنه څرګندوي.
هغه ټینګار کړی، چې د سیمې د ثبات او امنیت ساتنې لپاره اړینه ده چې ټول بریدونه ودرېږي او ښکېل اړخونه د ستونزو د حل لپاره د خبرو مېز ته ستانه شي.
حامد کرزي د ملکي وګړو او ملکي سیمو د خوندیتوب په برخه کې نړۍوالو قواعدو ته پر درناوي ټینګار کړی او هیله یې څرګنده کړې، چې د ایران خلک، په دغه هېواد کې افغان کډوال او د سیمې د نورو هېوادونو خلک له بریدونو او زیانونو خوندي پاتې شي.
