د اسراییل پوځ د ایران د اوو لوړپوړو چارواکو له وژل کېدو خبر ورکړ

د افغانستان پخوانی ولسمشر حامد کرزي پر اېکس په یوه اعلامیه کې د ایران خلاف د امریکا او اسراییل نظامي ځواک کارول د مسایلو د سوله‌ییز حل په برخه کې له نړۍوالو تعهداتو سره په ټکر کې بللي دي.

کرزي د سیمې نورو هېوادونو ته د جګړې پر غځېدو اندېښنه ښودلې او ویلي یې دي، چې له دې امله په سعودي عربستان، متحده عربي اماراتو، قطر، بحرین، کویت او اردن کې د خلکو پر متاثره کېدو ژوره اندېښنه څرګندوي.

هغه ټینګار کړی، چې د سیمې د ثبات او امنیت ساتنې لپاره اړینه ده چې ټول بریدونه ودرېږي او ښکېل اړخونه د ستونزو د حل لپاره د خبرو مېز ته ستانه شي.

حامد کرزي د ملکي وګړو او ملکي سیمو د خوندیتوب په برخه کې نړۍوالو قواعدو ته پر درناوي ټینګار کړی او هیله یې څرګنده کړې، چې د ایران خلک، په دغه هېواد کې افغان کډوال او د سیمې د نورو هېوادونو خلک له بریدونو او زیانونو خوندي پاتې شي.

عراقچي په دې لیک کې ویلي، د امریکا او اسراییل په بریدونو کې د ایران یو شمېر دفاعي تاسیسات او د ولسي وګړو کورونه په نښه شوي دي.

عراقچي همداراز د امریکا او اسراییل د بریدونو پر وړاندې له خپل ځان څخه دفاع خپل حق بللی او زیاته کړې یې ده، چې د ایران وسله‌وال ځواکونه به له خپلو ټولو امکاناتو او دفاعي وسایلو استفاده وکړي.

نوموړي خبرداری ورکړی چې، په سیمه کې د بریدګرو هېوادنو ټولې نظامي اډې، تاسیسات او شتمنۍ د ایران مشروعي نظامي موخې دي او تر هغو به پر یادو تاسیساتو خپلو بریدونو ته دوام ورکړي، چې جګړه په بشپړ ډول ودرول شي.

عباس عراقچي همداراز پر ایران د امریکا او اسراییل بریدونو ته د رسېدنې په موخه د امنیت شورا د بېړنۍ غونډې د جوړېدو هم غوښتنه کړې ده.

د ایران د بهرنیو چارو وزارت په وینا، د عراقچي دغه لیک د مګرو ملتونو د غړو هېوادونو بهرنیو چارو وزیرانو ته هم استول شوی دی.

عبدالله عبدالله پر ایران د اسراییل او امریکا د بریدونو په غبرګون ویلي، چې یاد بریدونه د نړۍوالو اصولو خلاف دي.

نوموړي زیاته کړې: «د ایران پر خاورې د بریدونو پیل په داسې حال کې چې د ځینو عربي هېوادونو د منځګړیتوب هڅې او مذاکرات روان وو، په کلکه غندو او دا د ایران د ملي حاکمیت ښکاره نقض بولو».

ډاکټر عبدالله عبدالله له ټولو ښکېلو لوریو غوښتنه کړې، چې له بشپړ زغم څخه کار واخلي او د کړکېچ د زیاتېدو پرځای دې اختلافات د خبرو اترو او ډیپلوماټیکو لارو حل کړي.

اسراییلي چارواکو ادعا کړې، چې خامنه‌يي احتمالا وژل شوی دی. خو د ایران د بهرنیو چارو وزیر عباس عراقچي ویلي:« تر هغه ځایه چې زه خبر یم، خامنه‌يي ژوندی دی».

د اسراییل ۱۲ چینل ویلي، چې اسراییل له امریکا سره په همغږۍ د خامنه‌يي په استوګنځي ۳۰ بمونه غورځولي دي او د راپورونو له‌مخې، د برید پرمهال خامنه‌يي هم په خپل استوګنځي کې و.

په یادو لومړنیو بریدونو کې د ایراني مشرانو او چارواکو د وژل کېدو په اړه بېلابېل راپورونه ورکړل شوي دي.

د اسراییل کان شبکې ویلي، چې داسې نښې نښاني شته چې د خامنه‌يي زوی مجتبی خامنه‌يي (د خامنه‌يي احتمالي ځای ناستی بلل کېده) هم وژل شوی دی.

د اسراییلي رسنیو په راپورونو کې ویل شوي، چې په وژل شویو کسانو کې د سپاه پاسداران د ځمکنیو ځواکونو قوماندان جنرال محمد پاکپور، د ایران د دفاع وزیر نصیرزاده، د ایران ولسمشر مسعود پزشکیان، د ایران د پوځ عمومي قوماندان سید عبدالرحیم موسوي، د خامنه‌يي احتمالي ځای ناستی علي لاریجاني، د سپاه پاسداران پخوانی قوماندان علي شمخاني، د قدس ځواکونو قوماندان اسماعیل قاني، د سپاه پاسداران د هوايي ځواکونو قوماندان مجید موسوي شامل دي.

ایران تر اوسه په رسمي ډول د یادو چارواکو د مرګ او ژوند په اړه څه نه دي ویلي.

د افغانستان پخواني ولسمشر حامد کرزي د ایران پر وړاندې د امریکا او اسراییل له لوري د نظامي ځواک کارول د هېوادونو ترمنځ د ستونزو د سوله‌ییز حل له نړۍوالو اصولو سره په ټکر کې بللی دی.

نوموړي د یادو بریدونو غندنه کړې او دا یې د افغانستان د ګاونډي په حق کې تېری بللی دی.

نوموړي په سیمه کې د جګړې له پراخېدو او په ځانګړي ډول په سعودي عربستان، متحده عربي اماراتو، قطر، بحرین، کویټ او اردن کې ملکي وګړو ته د احتمالي زیانونو اوښتو په اړه هم ژوره اندېښنه څرګنده کړې.

حامد کرزي ویلي، چې د سیمې د ثبات او امنیت د ساتلو لپاره باید ټول بریدونه ودرول شي او ستونزې دې د خبرو اترو له لارې حل شي.