ټرمپ وايي کیوبا به «ژر سقوط وکړي»
د امریکا د متحدو ایالتونو ولسمشر ډونالډ ټرمپ وايي، چې کیوبا به «ژر سقوط وکړي». نوموړي ویلي، چې دا هېواد په کلکه لېوالتیا لري چې له متحدو ایالتونو سره یو ډول هوکړې ته ورسېږي.
ټرمپ د جمعې په ورځ له سياېناېن شبکې سره په مرکه کې زیاته کړه، چې غواړي خپل د بهرنیو چارو وزیر مارکو روبیو ته دنده وسپاري څو دا موضوع په جدي ډول تعقیب کړي او پر مخ یې یوسي.
ډونالډ ټرمپ وایي، چې کیوبا له پنځوسو کلونو وروسته اوس د بدلون لپاره چمتو ښکاري. د هغه په خبره، د دې موضوع د څېړلو او سمبالولو لپاره کافي وخت شته او کیوبا اوس له لسیزو وروسته داسې پړاو ته رسېدلې چې د یوې هوکړې لپاره اماده برېښي.
نوموړي همدارنګه زیاته کړه، چې د تېرو پنځوسو کلونو په موده کې یې د کیوبا سیاسي او ټولنیز بدلونونه له نږدې څارلي دي او د هغه په باور اوسنی حالت داسې لوري ته تللی چې پایله یې د امریکا په ګټه تمامه شوې ده.
خو ټرمپ ټینګار وکړ، چې دا مهال د امریکا د حکومت اصلي پام د ایران پر وړاندې پر روانې جګړې متمرکز دی.
