زېلېنسکي: نړۍواله ټولنه باید د روسیې د جګړې مالي سرچینې بندې کړي
د اوکراین ولسمشر ولادیمیر زېلېنسکي وايي، چې روسیې په تېره یوه اوونۍ کې د بېلابېلو وسلو په کارولو سره پر اوکراین زرګونه بریدونه کړي دي. هغه ټینګار کړی، چې د ملکي تاسیساتو د ساتنې لپاره د هوايي دفاع سیسټمونو ته بېړنۍ اړتیا ده.
زېلېنسکي پر اېکس پاڼه په خپاره کړي پیغام کې ویلي، چې روسي ځواکونو په تېره اوونۍ کې پر اوکراین نږدې ۱۷۵۰ بېپیلوټه الوتکې، ۱۵۳۰ هدایت شوي هوايي بمونه او ۳۹ توغندي کارولي دي.
هغه زیاته کړې: «په دغه بریدونو کې ملکي بنسټونه، د انرژۍ تاسیسات او استوګنیزې ودانۍ هم په نښه شوې دي». د اوکراین ولسمشر ویلي، چې پوځ یې د دغه بریدونو ګڼې موخې شنډې کړې؛ خو د ملکي تاسیساتو د ساتنې لپاره لاهم د هوايي دفاع نورو وسایلو ته اړتیا شته.
زېلېنسکي همداراز پر نړۍوالې ټولنې غږ کړی، پر روسیې او د هغې پر همکارانو بندیزونه لا سخت کړي او هغه سرچینې وتړي چې د جګړې د دوام لپاره مالي ملاتړ برابروي. هغه زیاته کړې، چې د همدې موضوعاتو په اړه به له اروپایي شریکانو سره خبرې وکړي.
