ستانکزی: د کابل پر ښار د پاکستان بریدونه د افغانانو ورځنی ژوند ګواښوي

داودزي دا څرګندونې د ایکس له لارې په یوه تفصیلي پوسټ کې کړې دي. هغه لیکلي چې د افغانستان پر هوايي حریم د پاکستان تکراري تېری او په لویو ښارونو هوایي بریدونه «د ورځې معمول» ګرځېدلې ده.

نوموړي د سیاسي مشرانو پر غبرګون هم نیوکه کړې او ویلي یې دي چې یوازې غندنه بسنه نه کوي. د ده په وینا: «تش غندل د درد دوا نه ده، وخت را رسېدلی چې ملت ته مراجعه وشي او په دې اړه ملي یوالی رامنځته شي.»

داودزي ټینګار کړی چې روان وضعیت نور د څو محدودو پېښو بڼه نه لري، بلکې دا «دوه اړخیزه جګړه» ده. هغه ویلي: «دا اوس د دوو ډلو یا رژیمونو ترمنځ نه، بلکې د دوو هېوادونو ترمنځ جګړه ده.»

هغه همداراز ادعا کړې چې پاکستان د افغانستان پر وړاندې له پوځي اقداماتو مخکې نړیواله او کورنۍ اجماع برابره کړې ده. د هغه په خبره، ان د ډونالډ ټرمپ ملاتړ هم ترلاسه شوی او په اسلام‌اباد کې د علماوو او سیاسي مشرانو غونډې جوړې شوې دي.

داودزي دغه ادعاوې «بهانې» بللې او ویلي یې دي چې د پاکستان موخې ژورې او خطرناکې دي. نوموړي خبرداری ورکړی چې د افغانانو ترمنځ تفرقه به وضعیت لا خراب کړي او زیاته کړې یې ده چې «متفرق لوری به ډېر تاوان ګالي.»

هغه په پای کې له افغانانو غوښتي چې د دښمن په ګټه کار ونه کړي او ویلي یې دي، هر څوک چې داسې وکړي، «تاریخ او ملت به یې ونه بښي.»

عمر دا څرګندونې د ایکس له لارې په یوه پوسټ کې کړې دي. هغه ادعا کړې چې د بریدونو تر شا یو «پوځي رژیم» ولاړ دی چې، د ده په وینا، «توغندي لري خو انساني ځواک او مشروعیت نه لري».

هغه په خپل پوسټ کې لیکلي: «پوځي رژیم توغندي لري خو سړي نه لري، جعلي جغرافیه لري خو تاریخ نه لري؛ که یې درلودای، نو د ابدالي، غوري او غزنوي نومونه به یې پرې نه اېښودل.»

عبدالباري عمر همداراز ویلي چې د ۶۵۰ ناروغانو او روغتیايي پرسونل وژل د «وحشیانو کار» دی، او زیاته کړې یې ده: «دا هغه کسان دي چې نه اسلام پېژني، نه انسانیت او نه اخلاق.»

ښاغلي حیدري دا څرګندونې د ایکس له لارې په یوه تفصیلي پوسټ کې کړې دي. هغه لیکلي چې د افغانستان ګڼې ټولنې د وژنو، بې‌ځایه کېدو او د ملکي تاسیساتو د ویجاړېدو له پرله‌پسې څپو سره مخ شوې دي، او دا وضعیت «نه جلا پېښې دي او نه هم پټې».

د نوموړي په وینا، دا حقایق د سیمې او له سیمې بهر د استخباراتي بنسټونو ته ښه معلوم دي او څو ځله د د ملګرو ملتونو د افغانستان مرستندویه پلاوي په راپورونو کې هم انعکاس موندلی، خو د نړیوال غبرګون کچه تر ډېره د راپورونو، لنډو معلوماتي ناستو او د اندېښنې تر څرګندونو محدوده پاتې شوې ده.

حیدري همداراز نیوکه کړې چې د ملګري ملتونه اړوند سیاسي، بشري حقونو او بشري مرستو بنسټونه، په ځانګړي ډول د امنیت شورا او دارالانشاء، تر اوسه د افغان ملکي وګړو پر وړاندې د ځینو خونړیو بریدونو په اړه «خپلواکه او هر اړخیزه څېړنه» نه ده پیل کړې.

هغه په خپل پوسټ کې ویلي چې دغه بریدونه لومړی د پاکستان له ملاتړه برخمنو طالبانو له لوري او په وروستیو کې د پاکستان د مستقیمو پوځي اقداماتو له لارې ترسره شوي دي.

د حیدري په ټکو، که حساب‌ورکونه رامنځته نه شي، نو د افغان ملکي وګړو پر وړاندې د تاوتریخوالي دا لړۍ به «بې له کوم خنډه» دوام ومومي.

ضعیف د ایکسله لارې په یوه تازه خپره شوې لیکنه کې ادعا کړې چې د پاکستان اړوند ځواکونه له مخامخ جګړې څخه تېښته کوي او پر ځای یې په کابل او نورو ولایتونو کې بې‌ګناه خلک هدف ګرځوي.

هغه په خپل پوسټ کې لیکلي: «مزدور او ذلیل دښمن د مخامخ جګړې څخه تېښته کوي، کنه ۱۲۰۰ کیلومتره د ډیورنډ په فرضي کرښه کې ورسره زمریان پراته دي، خو دوی په کابل او نورو ولایتونو کې بې‌ګناه وګړي په نښه کوي، دا د بزدلۍ او بې‌غیرتۍ انتها ده.»

ضعیف همداراز د ډیورنډ کرښې ته په اشارې سره ویلي چې که جګړه رښتینې وي، نو د و ډيورنډ کرښې په اوږدو کې د مقابلې لپاره کافي ځواکونه موجود دي، خو د ده په وینا، د ښارونو دننه د ملکي وګړو په نښه کول د جګړې له اصولو سره په ټکر کې دي.

منظور پښتین ویلي، «ترهګر پنجابي استعمار (پاکستان)» د کابل پر یوه روغتون ترهګریز هوايي بمبار کړی او له امله یې تر درملنې لاندې سلګونه بې‌ګناه ملکي وګړي یې وژلي او ګڼ نور یې ټپيان کړي دي.

پښتین زیاته کړې: «موږ د دې دردونکې پېښې پر ضد د خپل افغان ولس ترڅنګ ولاړ یو. پي‌ټي‌اېم به د نړۍ هر ګوټ ته د دې مظلومې وینې غږ رسولو لپاره خپله طرحه جوړوي».

هغه په ډاګه کړې، په لر او بر کې د «استعماري قوتونو» او پروژو ظلمونه ورځ تر بلې زیاتېږي او زیاته کړې یې ده: «په داسې وخت کې په لوی زړه سره د مِلي مشورې او مِلي قیام انتظام به د ملت قوت یو کړي چې ملت ته به یې ډېره ګټه او دوښمن ته به یې ډېر زیان وي».