د افغانستان لپاره د پاکستان ځانګړي استازي محمد صادق په اسلاماباد کې د روسیې له سفیر سره کتلي او د سیمې پر وضعیت یې خبرې ورسره کړې دي. د روسیې سفیر د سې شنبې په ورځ ویلي وو، چې د پاکستان او طالبانو ترمنځ د نښتو پر ډېرېدو اندېښمن دی، ځکه ملکي وګړي پکې وژل کېږي.
محمد صادق ویلي، چې دواړو لوریو د سیمې د ثبات د پیاوړتیا، ګډو هڅو د پراخولو او د دوهاړخیزو اړیکو د لا ژورتیا پر اړتیا ټینګار کړی.
دواړو لوریو زیاته کړې چې د سیمهییزې همکارۍ زیاتوالی کولی شي د امنیتي او اقتصادي ګډو هدفونو په ترلاسه کولو کې مهم رول ولوبوي.
تر دې مخکې، د پاکستان لپاره د روسیې سفیر البرت خوروف د سې شنبې په ورځ وویل، چې هېواد یې د پاکستان او طالبانو ترمنځ د نښتو د زیاتوالي له امله اندېښمن دی، ځکه ملکي وګړي یې په پایله کې وژل کېږي. هغه له دواړو هېوادونو وغوښتل چې اختلافات د خبرو له لارې حل کړي.
خوروف وویل: «زموږ دریځ دا دی چې اړوند لوري باید ژر تر ژره د خبرو میز ته کښیني او د سیاسي او ډیپلوماتیکو لارو چارو له لارې د دې وضعیت حل لاره پیدا کړي».
د کندهار له بېلابېلو بازارونو څخه سرچینو افغانستان انټرنشنل - پښتو ته د اختر د چمتووالي انځورونه لېږلي. سرچینو د ناامنۍ وېرې، د عامو خلکو د ګڼې ګوڼې او د کندهار په بازارونو کې د توکو په پېرلو کې د خلکو پراخې بېوزلۍ او کمزوري اقتصادي وضعیت ته اشارې کړې ده.
شېرمحمد چې د کندهار په هرات بازار کې وچه مېوه پلوري وايي، بازارونه تر پخوا ساړه دي او خلک یوازې د اړتیا وړ توکي پېري: «سودا نه کېږي او خلک یوازې ګرځي، نرخونه ګوري، لږه سودا کوي او اکثره بېرته تش لاسونه ستنېږي».
د خلکو په وینا؛ بېوزلي، د عوایدو کمښت او د کار نشتوالی هغه څه دي چې د اختر پر چمتووالي یې سیوری غوړولی دی. د بوټونو یو سوداګر چې نه غواړي نوم یې واخیستل شي وايي، د وروستۍ ناامنۍ وېرې هم د خلکو پر ورځني ژوند اغېز کړی او دغه وضعیت د سوداګرۍ پر بهیر منفي اغېز لري.
ناوړه اقتصادي وضعیت، امنیتي اندېښنې او په بېسارې توګه د کډوالۍ دوام هغه ستونزې او اندېښنې دي، چې افغانان ورسره لاس او ګرېوان دي. له دغه ټولو ناخوالو سره - سره بیا هم د اختر نمانځل افغانانو ته تر نورو ټولو مراسمو خورا مهم وي او په پراخه توګه یې نمانځي.
کندهار ښار په انځورونو کې
کندهار هرات بازار خلک د اختر تیاریو لپاره راوتلي
دا د کندهار شهیدانو چوک ته څېرمه د سړک پر غاړه د څپلیو پلورونکی دی. ډېر هغه خلک دلته سودا کوي چې اقتصادي وضعیت یې ښه نه وي؛ ځکه د دې بیې تر مغازو مناسبې وي.
دا د کندهار په هرات بازار کې د وچې مېوې پلورونځي دي، په دې شپو او ورځو کې ډېری خلک د سړکونو پر سر هم وچه مېوه پلوري.
په کندهار کې د طالبانو د امنیې قوماندانۍ د معلوماتو له مخې؛ د اختر د شپو او ورځو د امنیت خوندي ساتلو لپاره یې ۱۰۰۰ کسیزه ځانګړې قطعه په ښار کې ځای پر ځای کړې. او دا هم د یادې قطعې یوه برخه ده.
چهارسوو د سړکونو پر سر د وچې مېوې او جامو د پلور کراچۍ او هټۍ
د بېوزلی نښې: سپين ږېری د سړک پر سر د کورونو زاړه توکي او د ماشومانو استعمال شوي کالي پلوري.
تنکی ځوان په چهارسو کې له یوې رېړۍ څخه ځان ته د اختر لپاره خولۍ خوښوي.
د کندهار په شاه بازار کې د سړک پر سر د وچې مېوې پلورونکي او پېرېدونکي.
د شهیدانو پر چوک یو شمېر خلک ښکاري، چې تر سودا پېرلو وروسته کورونو ته روان دي.
د بېوزلۍ نښې: د ښار په یوه څنډه کې یو شمېر خلک د اختر لپاره په تیاریو بوخت دي؛ خو په څو مترۍ کې یې بیا ډېری کسان کړۍ ورځ د کار په لټه د سړک پر غاړه تېروي.
کندهار شهیدان څلور لارې