د هېواد په ۱۲ ولایتونو کې د سخت باران، تالندې برېښنا او ناڅاپي سېلابونو اټکل شوی

د یادې ادارې د خبرتیا له مخې، په بدخشان، تخار، کندوز، پنجشېر، پروان، بغلان، سمنګان، خوست، کونړ، نورستان، لغمان او ننګرهار ولایتونو کې د باران کچه د سیمو له مخې له ۱۰ تر ۲۵ ملي مترو پورې اټکل شوې ده.

په خبرتیا کې راغلي چې د هېواد په مرکزي، ختیزو، شمالي، سوېل ختیزو، سوېلي او لوېدیزو سیمو کې د چټکو بادونو او دوړو د توپانونو احتمال هم شته.

د هوا پوهنې ادارې د معلوماتو له مخې، د بادونو چټکتیا به په بېلابېلو سیمو کې له ۵۰ تر ۸۵ کیلومترو په ساعت کې وي.

یادې ادارې له خلکو غوښتي چې د احتمالي سېلابونو، سختو بادونو او نورو طبیعي پېښو پر وړاندې لازم احتیاطي تدابیر ونیسي.