ناپېژاندو وسلهوالو د بلوچستان د ګوادر په پوله څلور پاکستاني پولیس تښتولي دي
د بلوچستان ایالت د ګوادر ولسوالۍ د کنټانۍ هور سیمې ته نږدې د پاکستان او ایران د سمندري پولې په سیمه کې څلور پاکستاني پولیس د ناپېژاندو وسلهوالو لهخوا تښتول شوي دي. وسلهوالو یاد پولیس له خپلو دولتي وسلو او رسمي موټر سره یووړل او نامعلوم ځای ته یې انتقال کړل.
د پولیسو په وینا؛ تښتول شوي کسان نیاز احمد، شعیب، احسان او ساجد علي نومېږي. ځایي پولیسو ویلي، پېښه هغه مهال رامنځته شوه چې دغه پولیسو یو «زمباد» موټر درولی و.
ویل کېږي په موټر کې افغان وګړي سپاره وو، چې په ناقانونه توګه پاکستان ته داخل شوي وو. سرچینې زیاتوي، پولیسو د موټر د نیولو په اړه د کنټانۍ پوستې مسوول ته خبر ورکړی و. نوموړي هغوی ته لارښوونه کړې وه، چې نیول شوي کسان د نورو قانوني اقداماتو لپاره د پولیسو حوزې ته ولېږدوي.
خو لږ وخت وروسته له دغه څلورو پولیسو سره اړیکه پرې شوه. وروسته په خواله رسنیو کې یو انځور خپور شو، چې پهکې لیدل کېږي یاد پولیس د ناپیژاندو وسلهوالو لهخوا له خپلو وسلو او موټرو سره تښتول شوي دي.
له یادې پېښې وروسته د پاکستان امنیتي ځواکونو او پولیسو په سیمه کې د لټون عملیات پیل کړي او د تګراتګ لارې یې تړلې دي. ځایي چارواکي وایي، د تښتول شویو پولیسو د موندلو او د بریدګرو د پېژندلو لپاره هڅې روانې دي.
