د طالبانو د صنعت او سوداګرۍ وزیر نورالدین عزیزي وایي، د قزاقستان د لومړي وزیر مرستیال او د اقتصاد وزیر سریک ژومانګارین په مشرۍ یو لوړپوړی پلاوی کابل ته راغلی دی. دا پلاوی چې قزاقستاني سوداګر هم پکې شامل دي، په افغانستان کې د پانګونې د بېلابېلو فرصتونو د ارزولو په موخه دا سفر کړی.
نورالدین عزیزي په کابل کې خبریالانو ته وویل، د قزاقستان دغه پلاوی د جمعې په ماخوستن (د غبرګولي ۲۹مه) کابل ته رسېدلی او په افغانستان کې به د غالیو، وچو او تازه مېوو، د مرمرو ډبرو او نورو کاني موادو په برخو کې د پانګونې فرصتونه له نږدې وڅېړي. د نوموړي په وینا، د قزاقستان حکومت او سوداګر غواړي په دغو سکټورونو کې خپل فعالیتونه پراخ کړي.
د طالبانو د صنعت او سوداګرۍ وزیر زیاته کړه، چې قزاقستاني سوداګر د افغانستان د ډبرو سکرو او همدارنګه د درملو په برخو کې هم د پانګونې لپاره ځانګړې لېوالتیا لري. هغه وویل، چې د دغو برخو ارزونه به د دواړو لورو ترمنځ سوداګریزې اړیکې نورې هم پیاوړې کړي.
د عزیزي د څرګندونو له مخې، دا مهال د افغانستان او قزاقستان ترمنځ د دوه اړخیزې سوداګرۍ کلنۍ کچه شاوخوا درې میلیارده ډالرو ته رسیږي او په وینا یې، دواړه لوري هڅه کوي، چې د نویو پانګونو له لارې دغه کچه نوره هم لوړه کړي.
