هالنډ کې افغان ژباړونکي د دایمي استوګنې له حقه بېبرخې شوي
هغه افغان ژباړونکي چې په افغانستان کې یې له هالنډي پوځ او حکومتي ماموریتونو سره کار کړی و، وايي د اروپايي ټولنې د کډوالۍ د نوي تړون له مخې به نور د دایمي استوګنې اجازه ترلاسه نه کړي.
هغه افغان ژباړونکي چې په افغانستان کې یې له هالنډي پوځ او حکومتي ماموریتونو سره کار کړی و، وايي د اروپايي ټولنې د کډوالۍ د نوي تړون له مخې به نور د دایمي استوګنې اجازه ترلاسه نه کړي.
د هالنډ رسنیو د راپور له مخې، دغو ژباړونکو ته رسمي لیکونه استول شوي چې پکې ویل شوي، د جون له ۱۲مې نافذ شوي نوي اروپايي تړون له مخې د نامحدودې پناه غوښتنې جوازونه نور نه ورکول کېږي. پر ځای یې دوی ته د درېیو کلونو لپاره د استوګنې اسناد ورکول کېږي.
ژباړونکي وايي، د هالنډي ځواکونو له ملاتړ وروسته یې په افغانستان کې خپل امنیت، دنده او راتلونکی له لاسه ورکړی او بېرته ستنېدل ورته ممکن نه دي. دوی زیاتوي چې ډېری یې د ۲۰۲۱ کال د کابل تر سقوط مخکې د هالنډ له حکومت سره د شویو هوکړو له مخې دغه هېواد ته لېږدول شوي وو.
دوی ټینګار کوي چې اوس په هالنډ کې کار کوي، مالیه ورکوي او ماشومان یې په هالنډي ښوونځیو کې زدهکړې کوي، نو ځکه باید د ځانګړې ډلې په توګه وپېژندل شي او د اوږدمهالې استوګنې حق ورکړل شي.
د هالنډ د کډوالۍ وزیر بارت فان دن برینک ویلي، د نوي اروپايي تړون له مخې نور چا ته دایمي استوګنه نه ورکول کېږي، خو ځینې نورې قانوني لارې شته چې له مخې یې کسان کولای شي په هېواد کې پاتې شي، لکه د تابعیت ترلاسه کول.
هالنډ له ۲۰۲۱ کال راهیسې یو شمېر افغان ژباړونکي، ساتونکي او نور ځايي کارکوونکي منلي، خو د هغوی د لېږد او مېشتېدو بهیر له انتقادونو سره هم مخ شوی او ورو بلل شوی دی.
