د امریکا د خزانې وزارت اعلان کړی، چې پر ایران یې نوي بندیزونه لګولي دي. په دغو بندیزونو کې یو شمېر ایراني وګړي او سوداګریز شرکتونه شامل دي چې په متحده عربي امارات او هانګ کانګ کې فعالیت کوي او له سپاه پاسداران او د ایران له نوي رهبر مجتبی خامنهيي سره تړاو لري.
د امریکا د بهرنیو شتمنیو د کنټرول ادارې ویلي، چې علي انصاري، په امارات کې مېشت ایراني وګړی، له سپاه پاسداران او مجتبی خامنهيي سره د مستقیم تړاو په تور په دغه لېست کې شامل شوی دی.
د دې ترڅنګ محمد درباني، شګوفه رستمابادي، محسن خندان، علياصغر خندان، احمد او امیر نوايي لواساني او زهرا سرشاري چې په ایران کې د صرافیو او اسعارو د تبادلې په برخه کې فعالیت کوي، هم تر بندیزونو لاندې راغلي دي.
په دغو نویو بندیزونو کې څو مهم شرکتونه او صرافۍ هم په نښه شوي دي. په دغو ادارو کې د لواساني او شریکانو تضامني شرکت، د محمد درباني او شریکانو صرافي، د محسن خندان او شریکانو تضامني شرکت، په هانګ کانګ کې د «سيډياېم ټرېډېنګ لمېټډ» شرکت، په امارات کې د «نابا الزکي» سوداګریز شرکت او د «سمارټ ګلوبل لمېټډ» په نوم شرکت شامل دي.
دا بندیزونه په داسې حال کې لګول کېږي، چې د امریکا ولسمشر ډونالډ ټرمپ په تازه څرګندونو کې ویلي، چې واشنګټن د خبرو اترو د دوام لپاره د اسلامي جمهوریت له غوښتنې سره موافقه کړې ده. ولسمشر ټرمپ په عین حال کې ټینګار کړی، چې د دواړو لورو ترمنځ پخوانی اوربند اوس پای ته رسېدلی دی.
د ایران او امریکا ترمنځ اړیکې تر ټولو بحراني مرحلې ته رسېدلې دي. د ۲۰۲۶ کال د فبرورۍ پر ۲۸مه د امریکا او اسراییل له بریدونو او د علي خامنهيي له وژل کېدو وروسته، مجتبی خامنهيي د نوي رهبر په توګه وټاکل شو؛ له دې وروسته د اسلامي جمهوریت له خوا د هرمز تنګي تړل او د امریکا سمندري محاصره د دې لامل شوه، چې په سیمه کې پوځي او سیاسي کړکېچ بېساري کچې ته لوړه شي.
