د طالبانو د عامې روغتیا وزیر نور جلال جلالي وایي، افغانستان د درملو له کمښت سره نه دی مخ او د پاکستاني درملو تشه په هېواد کې د درملو د تولیداتو په زیاتېدو او له هند، بنګله دېش او نورو هېوادونو څخه واردیدونکو درملو ډکه کړې ده.
جلالي چې په ارزګان ولایت کې د ملګرو ملتونو د کډوالۍ سازمان له خوا جوړ شوي روغتیایي مرکز په پرانېست غونډه کې وویل، له پاکستان سره د سوداګریزو لارو تر تړل کېدو وروسته د ځان بسیا کېدو په موخه د افغان درملو تولید چټک شوی او له هند، بنګله دېش او د منځنۍ اسیا له هېوادونو څخه د درملو واردات زیات شوی دی. نوموړي ویلي چې اوس د افغانستان په بازارونو کې د پاکستاني درملو تشه نه احساسیږي.
خو په ورته مهال لا هم د افغانستان په بازارونو کې پاکستاني درمل موندل کېږي او طالبانو نږدې هره ورځ پاکستاني درمل د قاچاقي او غیرقانوني درملو په توګه له نیولو وروسته سوځوي.
