د طالبانو مخالفې ډلې، ازادۍ جبهې ادعا کړې چې طالبان د پراخو تبلیغاتو او پروپاګند له لارې د عامه افکارو د منحرفولو او د واقعیتونو د تحریف هڅه کوي، خو د دغه جبهې په وینا، د خلکو پوهاوي او ویښتیا دا هڅې ناکامې کړي او خلک د ریښتیا او درواغو ترمنځ توپیر کولای شي.
یادې جبهې په یوه اعلامیه کې ویلي: «طالبان هڅه کوي د پراخو تبلیغاتو او پروپاګند له لارې عامه افکار منحرف او واقعیتونه سرچپه وښيي، خو خلکو په خپل پوهاوي او ویښتیا ثابته کړې چې حقیقت له درواغو بېلولی شي او د رواني جګړې ښکار نه کېږي.»
د اعلامیې له مخې، په ټولنیزو شبکو کې د ازادۍ جبهې له جنګیالیو څخه د خلکو پراخ ملاتړ ښيي چې د ازادۍ او د استبداد پر ضد مبارزه د خلکو په ویښ وجدان کې ژورې ریښې لري او هېڅ تبلیغاتي کمپاین نه شي کولای دا حقیقت پټ کړي.
ازادۍ جبهې د خلکو ملاتړ د خپلو جنګیالیو لپاره د مورال او هڅونې مهم لامل بللی او ویلي یې دي: «د خلکو د ملاتړ او همدردۍ پیغامونه زموږ د جنګیالیو لپاره د زړه ډاډ او د لا زیاتې مبارزې ځواک دی.»
جبهې همداراز ټینګار کړی چې د خلکو پوهاوی، «له خدای تعالی څخه تر توکل وروسته، زموږ د مبارزې اصلي تکیه او د الهام سرچینه ده» او زیاته کړې یې ده چې د همدې ارزښتمنې پانګې پر مټ به د ازادۍ، عدالت او انساني کرامت تر تحقق پورې خپلې مبارزې ته دوام ورکړي.
د اعلامیې په پای کې ازادۍ جبهې له هغو افغانانو مننه کړې چې د جبهې په وینا، د خپل غږ، قلم او حضور له لارې یې د دوی ملاتړ کړی دی.
